KUCHING: Nembiak ke ngelanggar Atur Tagang Pejalai (PKP) enda patut diukum jil, ku Dr Madeline Berma.

Ketuai Komiti Hak Pendiau Rayat Malaysia (Suhakam) Sarawak nya madah nembiak ke berumur baruh ari 18 taun enda patut diukum jil.

“Sida semina patut diberi jaku gerah ti terit, ukai dijil laban sida semina ngelaban gerah, ukai orang udah ditemu salah (ngereja ulah jai),” ku iya lebuh dirandau Suara Sarawak.

Kelimpah ari nya ku iya, nitihka Perkara 3 Konvensyen Mengenai Hak Kanak-Kanak (CRC), perintah patut seruran nyadika guna anak mit tu nyadi pekara ti keterubah.

“Tu entara kebuah nembiak baruh umur 18 taun enda patut diukum jil,” ku iya.

Nitihka Perkara 3 Konvensyen Pasal Hak Anak Mit (CRC), genap pekara bekaul enggau anak mit baik ke nya diaku institusyen pengelantang komuniti perintah tauka peribit, piak penerit pengatur pengawa tauka undang-undang, guna pemesai reti anak mit nya patut nyadi pekara ti keterubah.