SIBU: Bantu pemakai terus diberi ngagai rayat enda ngira endur diau kelebih agi ba sitak Ngemah.

Adun Ngemah, Alexander Vincent, madah, sida napi pemar lebuh nganjung bantu pemakai ngagai peranak menua ulu kelebih agi menua ke semina ulih dilawa nengah jalai ai.

Taja pia ku iya, semua nya enda nanggul raban ari Palan Servis Komuniti Adun Ngemah mantu rayat maya Atur Tagang Pejalai (PKP) dipejalai ba menua tu.

“Sekeda rumah panjai ba menua tu nadai datai jalai darat, semina ulih dilawa nengah jalai ai kelebih agi sida ke diau jauh ba entigis sungai.

“Nya alai piak kami udah ngaga enggau naka ulih mantu sida ke diau ba menua ulu ngena chara ke patut,” ku iya madah ba siti penerang, kemari.

Palan Servis Komuniti Adun Ngemah meri bantu pemakai baik nya ngena jalai darat, jalai ai tauka perengka pengangkut ke bukai ti ulih nganjung pemakai ngagai rayat ba rumah panjai ba menua ulu kelebih agi di Rantau Lugai, Ulu Ngemah, Kanowit.