BINTANGOR: Peranak Bintangor ditu meretika tuju atur nyaga takah enggau pangan diri nyengkaum lebuh ngambi duit ba bank.

Apin lama ti udah, Menteri Besai Tan Sri Muhyiddin Yassin mantaika Bantu Prihatin Nasional (BPN) ke alai bantu nya diberi ngagai genap rayat ke patut nerima ti dipasuk ngagai akaun berengkah ari 6 ngagai 12 April ungkup renggat keterubah.

Berindik ari nya, peranak menua ulu nyengkaum sida ke diau ba menua pesisir nurun ke mengeri tauka ke pasar semina deka meresa enggau ngambi duit bantu ba bank.

Ba siti penerang kemari, peranak Bintangor dipeda chukup meretika atur nyaga takah lebuh deka mansutka duit ari bank ke bisi ba menua nya.

Sida dipeda berintai nganti gintir diri, lalu bediri ba kelai ke udah diletak ba luar bank.

Pengawa nitihka atur nyaga takah enggau pangan diri tu mandangka siti ari kebuah pelilih nya agi mengkang ba zon gadung sereta nadai rikod kes pengerekai igi penyakit Covid-19.

Ba Bintangor, bisi tiga bank bejalaika operasyen iya nya Bank Simpanan Nasional (BSN), Hong Leong Bank enggau Public Bank ti ngemuntangka pengawa mensia mayuh ngatur belanja sida.

Ba genap bank nya, mensia mayuh dipeda benung berintai manah lalu nyaga takah diri enggau pangan diri baka ke udah dilalau perintah.