SIBU: Markas Pemerintah Medan Timur Soldadu Darat mantu Perintah Sarawak nganjung bantu bekal pemakai ngagai kandang menua ulu ba lima sitak Dun.

Nitihka penerang ari Markas Pemerintahan Medan Timur Tentera Darat, lima sitak nya nyengkaum Mulu, Telang Usan, Batang Ai, Meluan enggau Pakan.

Bisi 19 endur ba lima sitak nya deka nerima bantu bekal pemakai ti dianjung berengkah ari 5 nyentuk 10 April tu.

Tim Bantu tu nyengkaum raban soldadu darat ti ngaga pengawa loading enggau off-loading lalu raban soldadu langit nganjung bekal pemakai ngagai endur ke udah dipilih.

Penerebai bantu nya dianjung ngena bilun EC 725 ti dikembuan TUDM lalu dibantu dua bilun EC 135 ari Hornbill Skyways Sdn Bhd.

Kenaka 5 April, Bario nyadi sitak keterubah nerima bantu 400 pek pemakai enggau empat sortie ditangkan enggau Miri ke alai 428 pek pemakai udah dianjung ngagai empat endur.

Nangkan nya, kena 7 April, semina dua endur mujur nerima bantu tiga sortie enggau 328 pek pemakai.

Enam bengkah endur apin nerima bantu berindik ari gaya hari enda manah ngujungka bantu enda ulih dianjung.

Kompeni Hornbill Skyways Sdn Bhd mantu nganjung bekal pemakai ngagai sektor Lubok Antu kenaka 7 April ke alai 14 sortie enggau 412 pek pemakai udah dianjung.

Lalu kemari (8 April), bisi 76 pek pemakai dianjung ngagau dua endur ba sitak nya.

Kelimpah ari nya di Julau, bisi enam buah rumah panjai nerima 117 guni bantu pemakai ti dianjung raban soldadu langit, tadi.

Entara rumah panjai nya iya nya Rumah Manding, Nanga Banyu (18 guni), Rumah Matili, Nanga Setusel (enam guni), Rumah Anthony Bau, Rantau Tapang (15 guni), Rumah Gerasi, Nanga Ju (36 guni), Rumah Nyalih, Lepong Bilat (26 guni) enggau Rumah Suing (16 guni).