SIBU: Saru ninga sada nyawa menyadi diri empu, siku penyelia indu sebuah serikat rugi RM8,000 pengudah ditipu orang ti telefon ngagai iya kena Hari Satu tu tadi.

Ketuai Polis Pelilih Sibu ACP Stanley Jonathan Ringgit madah, indu beumur 24 taun nya benung kereja lebuh iya nerima kangau ari saspek kena 6 April.

“Lelaki nya madahka diri menyadi iya ti bekereja ba Singapore.

“Indu nya ngumbai lelaki ke telefon nya menyadi iya laban sada nyawa saspek nyauka sama,” ku Stanley ba sebengkah penerang, ditu kemari.

Stanley madah, saspek madah ngagai indu nya ke alai iya deka pulai ke Sibu dalam bulan April tu lalu deka nginjau RM8,000 nyadika puku bedagang ditu begulai enggau bakih iya.

“Saspek minta mindahka duit nya ngagai akaun bakih iya laban akaun iya bisi penanggul nerima deposit.

“Ba hari ke sama, indu nya minta laki iya mindahka duit baka ke diasuh saspek.

“Urung pukul 5.38 lemai nya, indu nya udah nganjung mesej ngagai menyadi iya nengah aplikasyen Wechat laban deka madahka duit udah dipindah ngagai akaun iya,” terang Stanley.

Taja pia ku Stanley, indu nya tekenyit lebuh menyadi iya madahka diri nadai kala telefon enggau minjau duit.

Sedarka diri udah ditipu, indu nya datai ke opis polis ngaga ripot.

“Kes tu dipansik nitihka Seksyen 420 Kanun Keseksaan laban nipu,” tambah Stanley.