SIBU: Gerempung Jalinan Anak Sarawak (JASA) Universiti Pendidikan Sultan Idris (UPSI) andal amat Perintah Sarawak ulih meri bantu belanja ngagai bala nembiak ari Sarawak ke belajar ba palan pelajar tinggi nya.

Presiden iya, Elijah Inka Allexander madah, tebal agi sida din diau nyuwa ba luar kampus diatu napi penanggul bebayarka suwa kelebih agi sekumbang Atur Tagang Pejalai (PKP) dilanjar.

“Penusah tu balat agi diasai sida ti datai ari ruang bilik kurang penatai pemisi.

“Nya alai, kami ngarap amat Perintah Sarawak ulih meri belanja dikena ngelempungka tating penusah ditapi bala kami,” ku iya lebuh dirandau pemberita, ditu tadi.

Nerang enggau silik, Elijah madah, nitihka pansik sida kena 27 March 2020, bisi 903 iku nembiak Sarawak ba UPSI enda pulai ke menua.

PESAN ARI UPSI… Elijah Inka Allexander

Ku iya, penyampau tu engka tau manggai 1,000 iku laban pansik nya semina digaga nengah on-line aja.

“Ari 903 iku nya, semina 32 peratus tauka 288 iku aja diau ba kolej tang 68 peratus agi tauka 615 iku diau tauka nyuwa ba luar,” ku iya madah.

Iya madah, sida ke diau dalam kolej, barang pemakai enggau perengkaguna endang chukup nyengkaum baka servis ATM.

“Piak universiti tu endang beratka pengelikun nembiak Sarawak ke diau ba kolej.

“Tang sida ke diau ba luar nya bepenanggul laban mayuh kedai makai ditutup, bisi pan jauh ari endur sida diau.

SUKUNG TEGUT… Dr Patricia Ganing

“Amat ulih ngudar nengah FoodPanda tang ukai semua bisi belanja ninting hari,” ku iya nambah.

Taja pan baka nya, ba pekara pengelikun, Elijah ngarapka bala apai indai sida di menua anang nangi laban piak universiti semampai ngemeratka pengelikun sida kelebih agi ari pengerekai Covid-19.

Penanggul ke nyadi tu bela dikenatika piak UPSI ke alai Unit Kawasan Luar Kampus enggau Majlis Perwakilan Pelajar (MPP) UPSI bisi nganjung barang pemakai ngagai sida kelimpah ari bantu belanja.

Bala pengelicha ari Sarawak mega semampai meri sukung ngintu pengelikun nembiak ke diau ba luar baka Dr Patricia Ganing enggau Dr. Samsudin Suhaili.

Dr Patricia lebuh ditanya madah, apai indai nembiak anang irauka pengelikun anak sida laban piak UPSI naka ulih meri bantu ngagai nembiak nyengkaum iya ke diau ba luar.

ANANG NANGI… Gilvin Bujang

“Anang irau laban piak universiti semampai nyaga enggau beratika pengelikun sida.

“Pia mega, apai indai di menua sama bela nyaga pengerai diri maya diatu, besaup nagang enggau mutuska rantai pengerekai Covid-19,” ku iya madah nyemetak.

Kelimpah ari nya ku Dr Patricia, universiti nya mega udah netapka nembiak deka kemisi tengan semester berengkah ari 18 March nyentuk 2 June 2020.

Ba pekara bekaul, Gerempung Jalinan Anak Sarawak UPSI udah berandau enggau pengari rayat kelimpah enggau raban Volunteer Sarawak sentang pengawa bepintaka bantu.

UPSI mega siti ari Palan Pelajar Tinggi ke pemadu mayuh nerima peranak Sarawak belajar dia kelimpah ngemendarka bala nembiak mengkang diau dia sekumbang timpuh PKP.

Gerempung tu andal amat mensia mayuh ke bukai bela gerah jari meri bantu pemakai enggau belanja ngagai sida lalu penerang silik tau ditanya nengah Facebook Jalinan Anak Sarawak UPSI RASMI.

Kitai mega diperansang semampai besampika igi penyakit Covid-19 jampat pukas lalu kitai ulih pulai ngereja pengawa baka selama.

KAMI LIKUN… Venessa Gerri

 

KAMI GERAI DITU… Scitech

 

RITA KAMI MANAH… Jason Ayut

 

LELENGGAU KE KITA… Geraldine Anne

 

SAMA DIAU JENUH BA RUMAH… Jasmin Jang

 

ANANG IRAU… Saffrina

 

AKU GERAI BA DITU… Clarissa Billy

 

ANANG TUSAH ATI… Lenny Limas

 

SERURAN NYAGA DIRI… Celine Julan Leo