SONG: Peranak ditu udah berengkah nerima bantu pemakai ari perintah ke napi penusah sekumbang Atur Tagang Pejalai (PKP).

Nya kebuah, Ketuai Bilik (KIR) ba sitak Dun Katibas nerima bantu pemakai nya ba Balai Mensia Mayuh Song.

Pengari Palan Servis Parlimen P.215 Kapit, Kaunsilor Lidam Assan, madah, mayuh orang putus pengawa sekumbang PKP diterit kelebih agi sida ti gawa kediri enggau begaji hari.

“Perintah nengah palan servis kami enggau kerejasama Komiti Penyangga Penusah Ngenyit Pelilih Song udah nganjung bantu pemakai ngagai peranak ditu chara berenggat,” terang iya.

Ku Lidam, bisi 139 KIR ari Rumah Austin Ikau, Rumah Nyulang enggau Kampung Gelam Song ba renggat keterubah udah nerima bantu pemakai nya, pagi tadi.

Nambahka bantu pemakai bukai deka disadung chara berenggat ngagai semua KIR berengkah minggu tu.

Ba lansa sama, Pemesai Pelilih Song Jackline August madahka Komiti Penyangga Penusah Ngenyit Pelilih Song enda nganjung mayuh staf ba pengawa nyadung bantu.

“Semina empat pengari JKKK aja dikemendar ngambi bantu pemakai tu.

“Kitai meseti nitihka atur PKP sereta nitihka atur pengelikun ti udah ditetapka perintah,” ku iya nerang.