JULAU: Siku volunteer lelaki ke diasuh nganjung bekal pemakai ngagai rumah panjai ba Sungai Nilau, Ulu Julau dipelaba lemas pengudah perau sida karam semak Nanga Senyuruk di Ulu Ensiring ditu, lemai Hari Dua tu tadi.

Adun Meluan, Rolland Duat Jubin nyereta tim ke nganjung bantu pemakai ngagai rumah panjai ba Ulu Ensiring maya nya nepan perau bukai.

“Aku bisi madah hari ujan lebuh sida datai ba rumah panjai kelapan, nganjung bantu ngagai Ulu Ensiring.

“Maya nya, semina sebuah da agi rumah panjai endur nganjung bantu iya nya Rumah Nyanyang (rumah panjai kepenudi),” ku iya.

Rolland mega bisi nangkan sida ngambika bemalam ba rumah panjai kepenudi nya (Rumah Nyanyang) laban hari udah petang lalu ai sungai pasang tang sida keran deka pulai ke Rumah Mancha, Ulu Ensiring, iya nya rumah panjai sida empu.

Ba lansa sama, Ketuai Polis Pelilih Julau DSP Ismuni Umar madah, lelaki benama Mazian Seliong, 35 taun, enggau dua bakih ke bukai benung ba rantau jalai mulaika diri nengah ai Nanga Nilau lebuh penusah nyadi urung pukul 5 lemai.

“Semina siku aja diripot lenyau seraya dua bakih iya mujur nyelamatka diri,” ku Ismuni lebuh dirandau, tadi.

Iya madah, sida benung bejalaika operasyen ngiga enggau nyelamat diatu begulai enggau raban Bomba enggau peranak rumah panjai besemak.

Caption: AGI NGIGA… Peranak rumah panjai besemak benung kiruh ngiga Mazian ke dipelaba lemas pengudah perau ditepan sida karam lebuh pulai nganjung bantu ari Rumah Nyanyang ba Ulu Ensiring ditu, kemari.