SIMANGGANG: Mensia mayuh patut nyimpan resit bebelika barang enti sema sida ngasaika pedagang bisi nikika rega barang sekumbang Atur Tagang Pejalai (PKP) tu.

Opis Menteri Dagang Dalam Menua enggau Pekara Penguna (KPNDHEP) meri gerah ngagai semua pedagang ti nikika rega sereta ngelalaika utai diguna nyentuk PKP tu abis.

Ketuai Pampang KPDNHEP Sri Aman Pelani Kemiti madah, ripot penguna meseti bisi penerang bekaul baka resit bebelika barang ba kedai nya.

“Aku minta penguna ulih meri penerang ke patut lebuh ngaga ripot ngagai piak kami.

“Penerang ke patut tu beguna amat ngambi ngemuntangka pengawa pemesai KPDNHEP bejalaika pansik laban resti bebelika barang nunjukka bida rega suba enggau diatu.

“Pansik silik pasal ripot sida deka muntang dikereja enti bisi resit nya,” ku iya nerang.

Nambahka nya, pemesai KPDNHEP semampau matau bekal barang, gaya rega enggau pengawa pedagang sekumbang PKP tu.