ENGKILILI: Urung 764 Ketuai Bilik (KIR) ari 27 buah rumah panjai Dun Engkilili nerima bantu bekal barang pemakai ari perintah nengeri nengah program Sarawakku Sayang sehari tu.

Adun Simanggang Datuk Francis Harden Hollis madah, pengawa nyadung bantu barang pemakai Sarawakku Sayang nya terus dipejalai pengudah sida abis baum tengahari tadi.

“Bantu keterubah disadung dibagi ngagai tiga sitak di Engkilili iya nya di SK.Ijok, SK Empelam enggau SK Basi,”ku iya lebuh dirandau pemberita, tadi.

Ku Harden bantu ba SK Ijok aja bisi 257 KIR ari 17 buah rumah panjai, penerima ba SK Empelam bisi 371 KIR ari 3 buah rumah panjai sereta ba SK Basi disadung ngagai 136 KIR ari tujuh buah rumah panjai.

Nangkan nya iya madah arapka nengah bantu nya ulih mantu peranak ditu napi penusah ketegal ketegal igi penyakit Covid 19 lalu ngujungka sida tepekul ba rumah nitihka atur PKP.

Sekeda ari sida nya tentu putus penatai belanja ketegal ti enda semina dikemendar diau di rumah.

“Ngarapka peranak ditu nyaga pengerai enggau likun sereta ngetan ke status zon gadung,”ku iya.