BINTULU: Pengawa nganjung bantu pemakai ngagai sitak Dun Kakus ditampung baru kemari.

Opis Bomba enggau Penyah Penusah (JBPM) Zon Tatau, Kaunsil Pemansang Bintulu (BDA), Polis Pelilih Tatau enggau staf ba OPis Palan Servis GPS Dun Kakus nyengkaum bala ketuai komuniti enggau ketuai raban bansa Pelilih Tatau besaup ngemujurka pengawa nya.

Entara bantu disadung baka berau, minyak makai, gula, mi, kupi, teh enggau ke bukai ungkup 686 Ketuai Bilik (KIR) ba empat palan nyadung bantu iya nya ba Sekula Primari (SK) Tayai Nanga Sidang, Rumah Ulen Nanga Tekalit, Sangan Tatau Ulu Kakus enggau Sungai Sangan.

Ba SK Tayai, bantu tu disadung ngagai 229 KIR datai ari semilan buah rumah panjai iya nya Rumah Joshua Renang, Rumah Suran Unow, Rumah Robinson Lingon, Rumah Norma Sanggat, Rumah Bair Mam, Rumah Oyau Kanyen, Rumah Roseta Lua, Rumah Ngumbang Ajum enggau Rumah Achun Imban.

Nambahka nya, 153 KIR ti udah nerima bantu tu datai ari lapan buah rumah panjai iya nya Rumah Dora, Rumah Micheal Junus, Rumah Ulen Segaya, Rumah Abong,Rumah Joseph Adam, Rumah Rundi Lanyau, Rumah Gundi Chunggat enggau Rumah Enjan Gos.

Ba kandang menua Ulu Kakus, bantu udah disadung ngagai 113 KIR lalu 132 KIR ba Sungai Sangan.

Menteri Muda ba Opis Kepala Menteri (Undang-undang enggau Adat Bumiputera) ti mega Adun Kakus Datuk John Sikie Tayai ngarapka pemeri tu deka ngelempungka tating belanja genap ruang bilik ti enda ulih mindah ngiga jereki sekalika ba kebun tauka ladang sawit endur sida gawa sekumbang PKP tu.

Ku Sikie, Palan Servis GPS Dun Kakus deka nganjung bantu ngagai kandang menua bukai dalam Dun Kakus nyengkaum rumah panjai di baruh Pelilih Tatau enggau sekeda ari Pelilih Selangau enggau Mukah.
Nambahka nya, iya madahka bisi 6243 ketuai bilik di baruh Dun Kakus.

Berebak enggau nya, iya ngelalau peranak kelebih agi ba sitak Dun Kakus ngambi semampai diau jenuh ba rumah enggau nitihka atur PKP kelimpah semampai nyaga pemeresi diri.

Ba pengawa nganjung bantu pemakai nya, John Sikie udah diarika Pemancha Gerosen Jubin.