KUCHING: Sarawak ngerikod siti kes bebadi nyawa ketegal Covid-19 lalu ngujungka bisi 13 kes bebadi nyawa ketegal igi pemyakit nya kenyau kes keterubah diripotka 17 March tu tadi.

Iya ke bebadi nyawa nya siku nembiak indu berumur 23 taun ti benung nampung pelajar di Universiti Malaysia Sarawak (Unimas) lalu diau di Kota Samarahan.

Nitihka penerang ari Komiti Penyangga Penusah Ngenyit Nengeri (JPBN), apai enggau indai nembiak nya udah dulu ditemu positif Covid-19.

Nembiak diripotka bisi penanggul enseput kena 30 March tu tadi lalu dipasukka ngagai Sepital Besai Sarawak (SGH) ba hari ke sama.

Nembiak nya diripotka bebadi nyawa pukul 9.42 pagi, tadi.

Nangkan nya, bisi enam kes baru positif Covid-19 diripotka kemari ti lalu ngujungka bisi 312 kes kenyau kes keterubah diripotka kena 13 March 2020.

Ari enam kes nya, bisi lima kes diperubat di SHH lalu siti di Sepital Bintulu.

Berebak enggau nya, bisi 141 kes baru orang dipelaba (PUI) bisi Covid-19 ti lalu ngujungka bisi 2,005 kes.

Ari penyampau nya, bisi 1,548 kes udah ditemu negatif lalu 145 kes PUI agi nganti pemutus ari makmal.

JPBN mega mantaika statistik kes PUI nitihka pelilih menua ke alai 100 kes dirikod di Kuching, Samarahan (12), Miri (10), Bintulu enggau Saratok (5), Bau (tiga), Serian (dua) lalu di Simunjan, Sri Aman, Betong enggau Mukah bela siti kes.