KUCHING: Penusah ditapi rayat sekumbang Atur Tagang Pejalai (PKP) deka dibantu enggau naka ulih.

Sapit Menteri Pengawa Bekebun enggau Komoditi II, Willie Mongin, madahka diri bisi nyima meda ulah sekeda piak ti ngumbai bala Adun tauka Kaban Parlimen makai duit bantu ungkup rayat.

“Aku enda lantang ati meda ulah sida ke ngumbai kami beambi ulih ari duit bantu RM200,000 diterima ari Perintah Sarawak.

“Ke bendar, duit bantu nya semina ungkup Adun aja dikena sida mantu rayat ba sitak Dun diri empu.

“Ambika semua nemu, kami ke nyadi Kaban Parlimen nadai nerima bantu baka nya,” terang Willie ba sebengkah penerang ba akaun Facebook iya tadi.

Iya ke nyadi Kaban Parlimen Puncak Borneo madah, sida semina nerima 1,000 tungkus bantu pemakai ti diagih Opis Pengintu Pengelantang Mensia Mayuh (JKM).

Ku Willie, bantu ke bukai datai ari penyiru enggau pengasih iya empu ngagai rayat ke tusah ti disadung nengah Palan Servis Puncak Borneo.

“Nya alai, anang nempa berita bula ti madahka bala Adun tauka Kaban Parlimen makai duit tauka beambi ulih ari duit bantu.

“Ulah enggau tuduh baka tu endang enda patut,” ku iya madah nyemetak.