KUCHING: Perintah Sarawak ngagihka RM1.5 juta ngagai Organisasyen Betanam Betupi dikena meli asil produk ari raban orang bumai ba nengeri tu.

Pengerekai igi penyakit Covid-19 enggau Atur Tagang Pejalai (PKP) ba menua tu meri empas ti balat ngagai sida ke betanam betupi enggau berikan nyual asil produk sida.

Sapit Kepala Menteri Datuk Amar Douglas Uggah Embas madahka Perintah Sarawak beratika pekara tu siti pekara ti berat laban pekara nya meri bekau ti negatif ngagai penatai pemisi sida lalu nguji mantu sida ke kena empas nya.

“Agih nya deka di eri ngagai sida ke bekaul enggau organisasyen nya ba selampur nengeri tu.

“Kelimpah ari nya, penyampau RM200,000 udah diagihka ngagai genap opis Kaunsil Makit Betanam Betupi Perintah Besai (Fama) selampur nengeri ngambika meli asil produk bala pengereja kebun lalu numbuhka Pasar Tani,” ku iya madah ba siti penerang, kemari.

Uggah ti mega nyadi Menteri Betanam Betupi Moden, Tanah Adat enggau Pemansang Kandang Menua meransang bala ke betanam betupi tauka berikan ngambika minta ngagai dua organisasyen nya ba pengawa nyual produk sida.

Nengah pengawa nya, organisasyen nya deka nyual produk tanam enggau asil berikan sida ngagai makit.
“Pekara tu udah dipejalaika sida ke betanam betupi enggau berikan di Betong, Samarahan, Meradong, Sibu, Limbang, Bintulu enggau Miri.

“Nya alai aku meransang kita ke bekaul ngambika berandau sereta betanya pasal pekara tu ngagai opis betanam betupi tauka Fama ke semak enggau kita,” ku iya.

Ku Uggah, Perintah Sarawak mega udah meri agih RM600,000 ngagai Kaunsil Pemansang Ikan Malaysia ngambika meli asil produk sida ke berikan.

“Inisiatif tu mandangka Perintah Sarawak seruran ngemeratka pengelantang suda ke betanam betpu enggau berikan ke kena empas tu.

“Sida tu pemain ke pemadu beguna ngambika rentayan pemakai kita seruran bisi, nya kebuah kami mantaika pekara tu ungkup sida,” ku iya.