MIRI: Serikat Gerup Samling udah nyuaka mesin Polymerase Chain Reaction (PCR) enggau kereban berubat ke bukai berega lebih ari RM400,000 ngagai Sepital Miri.

Bantu nya udah disua ngagai Direktor Sepital Miri, Dr Jack Wong seraya dikemata Menteri Perengka Pengangkut Datuk Lee Kim Shin ba Wisma Syarikat Kumpulan Samling Miri, ditu ensaus.

Nitihka penerang, pemeri nya udah ngasuh Sepital Miri disikap mesin PCR ngambi beperesa virus Covid-19.
Pia mega ku Kim Shin, serikat Gerup Samling mega udah melanja semua ungkup nyeleti makmal Sepital Miri nyentuk Makmal Molecular endur beperesa PCR lalu disadang tembu dalam kandang dua minggu.

“Miri diatu ulih endur beperesa virus Covid-19 pengudah disikap makmal enggau mesin PCR tu.

“Kitai diatu ulih nemu tumu agi pemutus nya kelimpah jampat temu enggau ulih ngereja utai ke patut ngambika pandemik tu enda ngerekai,” ku iya lebuh dirandau ba pengawa nyuaka mesin nya.

Iya ti mega Chairman Komiti Penyangga Penusah Ngenyit Bagi Menua Miri meri tabi puji enggau terima kasih ngagai Serikat Gerup Samlig enggau semua serikat ba selampur Sarawak laban udah nyuaka bantu.

“Tu mih sebuah serikat korporat ti semampai mantu enggau bekerejasama rat enggau Perintah Sarawak lebuh nyaup nagang pengerekai igi penyakit Covid-19 tu.

Nangkan nya, Ketuai Pemesai Eksekutif Gerup Samling, Lawrence Chia mega pemeri nya deka diberi ngagai sepital besai di Bintulu, Sarikei, Lawas enggau sepital besai bukai tauka klinik perintah ti semak.

Sama datai Menteri Muda Dagang Temuai Datuk Sebastian Ting enggau Pemangku Residen Bagi Menua Miri, Abdul Aziz Mohd Yusuf.