SEKALI tu, kitai ngenang pasal adat pemati komuniti Iban Saribas ngambika kitai nemu sentang tusun pejalai adat pemati nya dataika ngenang niang ke udah midang ninggalka kaban belayan ba menua tu.

Adat pemati bansa Iban Saribas tu bisi bida enggau pejalai adat Iban lalu nya kebuah, kitai patut nyerungkai enggau nusui baru pejalai tu ngambika rebak biak nemu sereta meretika adat pemati bansa Iban Saribas.

Ku siku graduet bidang Sains Sosial ari Universiti Malaysia Sabah (UMS), Nicholas J. Ugik, iya udah minta tusi sida ke tuai bekaul adat pemati bansa Iban adap menua Saribas lalu ngempung semua penemu nya ngambi ulih nampung genap tusun pemati tu ngagai semua kitai.

Lebuh ngelansa, Nicholas madahka bansa Iban Saribas mengkang ngemeranka adat lama taja dunya udah mansang lalu bisi sekeda peranak Iban udah megai pengarap Kristian.

Genap komuniti ba dunya bisi adat ngelaika komuniti sida enda ngira endur, bansa enggau menua lalu bansa Iban Saribas pechaya, bisi pengidup bukai pengudah sida midang ninggalka dunya tu.

Bansa Iban mega pechaya semengat bukai ba pengidup di dunya pengudah mati tauka dikumbai kitai, dunya sebayan.

JERITA IBAN NUNDAKA ADAT PEMATI

BAYA… Tajau deka diengkah ba tisi pendam ke kelai sapa bagi empu pendam.

Nitihka tipan sejarah Iban pasal Bejie Nangga Hari (nikika langit) lebuh Bejie enggau menyadi iya, Bada diasuh Raja Semarugah ngentak sebuah rumah panjai ngambi ngempung semua bala kaban belayan iya.

Udah nya, Puntang Raja (bala raja) udah diasuh raja meri sanding penemu ngagai Orang Iban ngepunka pengawa ngentak rumah panjai lalu nya mih pun tipan jerita raban bansa Iban nirika pengentap asal sida.

Nyau kelama udah berumah panjai, bisi siku ketuai bansa Iban benama Serapuh ngetuaika bala iya ba siti komuniti rumah panjai enda nemu bakani numbak sida ke udah parai lalu nadai adat pemati enggau numbakka bangkai nya tang semina dibuai enggau diengkah ba selepak kayu besai ba dalam kampung.

Nyentuk hari siti, lebuh peranak rumah panjai sida Serapuh deka muai bangkai nya dalam sungai, siku lelaki ngelara sida ari pendai nanya nama utai benung dikereja sida nya.

Lelaki nya alit ati meda ulah sida serumah ke nadai bejalaika adat lebuh numbak bangkai nya seraya dibuai pia aja.

Kenyau ari nya, peranak rumah panjai Serapuh parai sehari siku ngujungka Serapuh kusut runding pasal sida serumah mayuh udah nadai.

Bisi sekali, maya malam hari lebuh peranak rumah panjai agi ngibun bangkai ti gegaring tengah ruai ke apin dibuai laban nganti hari siang, bisi siku lelaki ke enda dikelala datai semak bangkai nya lalu nyabak sereta nutup mata enggau mulut niang ke agi tebuka nya.

Serapuh tekenyit enggau alit ati meda iya datai kia lalu nanya sapa lelaki tu. Dia iya madahka diri benama Puntang Raja, orang diasuh Raja Samarugah nurun ke dunya.

Udah nya, Puntang Raja lalu ngajar Serapuh pasal adat pemati enggau penti pemali ke patut dititih lebuh bisi pemati ba rumah panjai enggau pengawa nya dikumbai Pesan Puntang Raja ngambi nyadi teladan enggau malin ngagai semua mensia sentang gaya idup bansa Iban ba adat pemati.

ADAT PEMATI IBAN SARIBAS

Ba adat pemati bansa Iban adap menua Saribas, enti bisi orang udah nadai ba rumah panjai nya, sida deka berumban ngagai bukit ba rumah panjai nya lalu malu tawak enggau inggar kelai nesau rumah panjai bukai bisi pemati ba rumah sida.

Nambahka nya, bangkai nya deka diberi mandi sereta alu enggau lesung deka didudukka chara melintang ba dua piak pintu rumah panjai ngambika ngempang bala sebayan ti deka ngeruga rumah niang ti agi idup.

Ku Nicholas, alu nya baka ular tedung enggau lesung nya bukit ti nagang semengat niang ari niki ke rumah panjai ngambika semengat niang semina bejalai ba baruh rumah panjai aja.

Pengudah niang diberi mandi, iya deka digari ngena ngepan pemadu manah seraya kaki ti udah dirapit nya deka ditanchang ngena ubung mirah enggau diengkah bulu landak seraya mata enggau mulut iya deka ditutup ngambi enda meda tauka ninga kangau semengat orang ti agi idup.

Nitihka pengarap lama, pinggai deka dikalih berapa kali ari baruh nyentuk ke atas bangkai nya ngambi nyeliahka tubuh niang jampat bebali lalu sida sebilik deka nyendiaka baya ti deka diengkah begulai ba larung ngambika bisi dikena niang ba dunya sebayan.

Bangkai niang tu deka digaga sapat ba rumah rumah panjai lalu sapat tu kelai nyelara dunya sebayan enggau dunya nyata sereta utai diguna enggau deka dibai niang ba larung deka diengkah ba tempuan.

Lebuh niang dianjung ke pendam, tajau deka dibai kelai batu pendam niang ba pendam lalu dian deka ditungkun ba dapur ngambi digaga nyadi tempuan ungkup meri penampak ngaga semengat niang ngagai dunya sebayan.

Berindik ari nya, tukang katu enggau bala bukai deka ngaga larung ungkup dikena engkah niang lebuh dianjung ke pendam.

Ba adat bansa Iban Saribas, gaya ukir ba larung niang tu nitihka pemesai pangkat enggau pemanah jasa iya lebuh agi idup.

Ambika banding, enti niang nya siku bujang berani, Tuai Rumah tauka sida ke beberita landik ngereja utai, larung iya deka diukir jauh manah ari orang bukai kelai ngingatka pemanah enggau jasa lebuh agi idup ba dunya.

Nya kebuah, bala Tuai Rumah, bujang berani enggau sida ke angkun ngetanka menua endang patut larung sida diukir enggau naka pemanah kelai kitai seruran ingatka jasa sida lebuh agi idup ba dunya tu kelimpah kenang tu mega nyadi basa kepenudi ngagai sida ke udah ninggalka dunya tu.

Ba hari kedua, bangkai tu deka ditaruh dalam larung laban nangika tubuh niang udah bisi bebali lalu pala iya deka dipindah nguing ngagai tanju seraya kaki iya diengkah adap ke bilik ba rumah panjai nya.

Pengawa mindahka bangkai tu ngambi ngemuntangka pejalai niang ngaga dunya sebayan lalu pengawa tu meseti dititih enti bisi pemati.

SABAK BEBUAH

Pengudah bangkai nya diengkah ba sapat, siku ari sida sebilik meseti ngibun bangkai nya tiap malam dataika dianjung ke pendam ngambika ukui tauka mayau enda meraka bangkai nya.

Sida ke ngibun nya mega nyabakka bangkai nya enggau meri bansa kepenudi lalu pemakai dikerindu niang deka diengkah ba tisi endur iya gali sepanjai timpuh adat pemati nya.

Ba malam kedua, tukang sabak deka ngelagu sabak bebuah ngambi ngembing pejalai semengat niang ngagai dunya sebayan ke alai siku lemambang indu ti udah tuai deka belagu sabak bebuah.

Kelimpah ari nya, Tuai Rumah deka ngempung semua Tuai Adat, bala tuai rumah bukai enggau orang tuai begelumur ba ruai niang ngambi berundingka adat bebasa ke patut dipejalai ungkup niang.

Lebuh berandau pasal pekara tu, bala tuai rumah enggau tuai adat deka berundingka gaya tauka status niang lebuh agi idup ngambi nentuka adat bebasa ke patut dipejalai ngagai niang tu.

Lemambang deka nyadaka sabak bebuah tu ba malam ketiga urung pukul 9 malam lalu iya deka duduk ba bangku dalam sapat ti diengkah ba tisi larung nya.

Sabak bebuah tu deka ngenang baru pasal pemanah enggau pengawa niang lebuh agi idup ba dunya sereta ngembing pejalai niang ngagai dunya sebayan ngambika pejalai iya lanchar enggau enda limpang ngagai endur bukai.

Urung pukul 10 malam, bala temuai deka begelumu semak ruai niang ngambi mendingka siku pengari nusui cherita sejarah pengidup iya, tanda basa ti deka diberi ngagai niang, endur ngulih enggau adat bukai bekaul enggau pemati tu.

Pagi siti urung pukul 6 pagi, larung tu deka ditanchang ngena buluh tepayan ngambi dibai ngagai pendam tang sebedau nya, dulu niang diberi piring kepenudi lebuh pinggai enggau mangkuk ditepu pemakai ti udah diberi ngagai niang deka dientak ba larung nya enggau dipechah seraya pinggai ke udah pechah tadi deka dibuai nengah lubang mit ba ruai nya.

Pengudah larung dibai ke pendam, dian deka ditungkun ba ruai sepanjai malam pemati nya enggau anak niang pemadu tuai deka entudi sida ke mai larung nya ngagai pendam.

Nambahka nya, abu deka dibai ke bilik ngambi diengkah ba dapur kayu lalu nungkun dian maya tiga malam, lima tauka tujuh malam berunggu bepanggai ba status enggau pemanah niang ba rumah panjai nya lalu pengawa tu dikumbai Lemai Tungkun Api.

Pengawa nungkun dian tu kelai sida niang sebilik ngingatka pemidang iya enggau ngingatka kenang begulai lebuh agi idup.

NUMBAKKA BANGKAI

Datai ba pendam, lubang pendam nya deka diunsut ngena darah manuk, leka berau enggau garam sebedau tanah nya dikerumbak penalam enam kaki ngambi mantaika piring ngagai Petara Sempulang Gana ngambi nerima niang ti ditumbak nya.

Sebedau larung ditama dalam lubang pendam nya, lubang nya meseti ditepas dulu ngambi nadai daun tama kia ngambi daun enda dialit sekali enggau larung nya laban daun nya tau ngasuh semengat niang ngeregau mensia ti agi idup.

Lebuh pendam udah ditumbak enggau larung ditepu dalam nya, langkau mit deka digaga pengudah pendam nya dialit kelai rumah niang lalu semua baya iya deka diengkah ba dia.

Terang iya, dikena nanda endur pendam iya, sida deka engkah tajau tauka tebelian adap ke pala niang lalu nya kebuah kitai suah meda mayuh taja enggau kayu tebelian ditemu ba pendam bansa Iban kelia.

Semua dia ti enggau pengawa numbak lubang pendam nya, sida deka ngaitka kayu mit enggau niki nengah tangga mit ari lubang pendam nya ngambi nyeliahka semengat sida tinggal ba pendam nya.

Udah tembu pengawa ba pendam, semua sida ti enggau ngagai pendam deka begelumur ba tebing sungai ngambi ngetu makai pemakai ti dibai ari rumah panjai ngambi nembuka semua adat ba pendam.

Kelimpah ari nya, sida niang sebilik nya orang kepenudi mulaika diri ari pendam deka ngeraut buluh enggau tajam lalu deka ditanam tunsang ba ujung pendam niang ngambika semengat niang ba sebayan enda enggau sida pulai ke rumah panjai.

Pengudah pulai ari pendam, semua sida ke enggau ngagai pendam tadi deka begelumu ba ruai ngambi berandau pasal pengawa ngetas ulit sida sebilik.

Kelia, adat ngetas ulit deka diengkah tiga, lima tauka tujuh tumpuk berau chelum ti diengkah ba sebilah duku lalu penyampau berau ba duku nya kelai pemanjai timpuh sida ngetas ulit.

Bansa Iban ba Saribas deka nukangka telenga atap ba perabung ngambi rumah tampak sepanjai timpu ngetas ulit laban sida niang sebilik enda ulih mindah berapa hari pengudah niang udah nadai.

Nya alai, dikena ngenang enggau basa ngagai sida niang sebilik, semua pengerami tauka utai inggar ba rumah panjai nya enda tau dikereja nandaka sida serumah sama sinu enggau beraieka niang ke udah nadai nya.

Ba pintu penama rumah panjai enggau pintu bilik sida niang sebilik deka digitang tambai nandaka sida agi sinu laban ditinggalka niang.

Barang sapa ti ngelanggar adat lalu enda bebasaka sida niang sebilik, deka kena tunggu tauka ukum lalu sida patut mayar tunggu nya ngagai sida niang sebilik nitihka adat basa ti udah ditetapka sida.

Nya alai, bansa Iban Saribas endang chukup bebasaka adat pemati enggau mengkang ngemeranka adat lama nya.

Bala nembiak rebak baru patut nemu adat tu ngambi meretika pengaya adat dikembuan bansa Iban kelia sebedau bisi pengarap Kristian baka ke diatu.

Adat tu ukai semina ngelaika bansa Iban tang mega ngayanka bansa kitai chukup bebasaka sida ke udah nadai enggau adat tu mega kelai kitai semampai ngenang orang ke udah nadai tauka mindah ngagai dunya sebayan.

Tamping minggu baru …