91 peratus KIR ba Sarawak udah nerima bantu

KUCHING : Naka Hari Empat tu tadi, Komiti Mit Bantu Pemakai madah 324,224 (91 peratus) ari semua 349,449 Ketuai Bilik (KIR) ba Sarawak ti rejister enggau Komiti Penyangga Penusah Ngenyit Bagi Menua (JPBB) udah nerima bantu pemakai ari Perintah Sarawak.

Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah madah bisi 63 kandang menua ba Sarawak udah tembu disadung bantu pemakai seraya 19 kandang menua benung dianjung bantu pemakai tu.

Terang Fatimah, nengha JPBB tu ulih mantu nentuka sida ke patut nerima bantu ba semua 82 kandang menua sekalika ba menua pesisir enggau menua ulu, orang seranta ba mengeri enggau sida ke nadai kereja tetap ketegal Atur Tagang Pejalai (PKP) ulih diberi bantu pemakai jam diatu.

“Genap sitak diberi agih belanja RM200,000 ti diberi nengah JPBB enda ngira sekalika sitak nya dipegai parti perintah tauka parti penyakal laban pengawa tu nadai kaul enggau pekara politik.

“Naka Hari Lima tu tadi, pengawa nganjung bantu pemakai ba sitak penyakal agi dipejalai enggau dipejalai JPBB iya nya Pemesai Pelilih, Opis Pengintu Pengelantang Sarawak, ejensi perintah bekaul, Palan Servis Adun, Parlimen enggau gerempung ukai dikuasa perintah (NGO) bekaul,” terang iya ngagai pemberita Suara Sarawak.

Fatimah nyemetak madah, semua belanja deka disua enggau dikena JPBB, nya kebuah semua bayar ngagai pemekal bantu pemakai tu deka dipejalai JPBB enggau lanchar ba semua bagi menua enggau pelilih.

“Semua rintai nama ari ejensi perintah baka Kaunsil Kandang Menua (PBT), Opis Pengintu Pengelantang Mensia Mayuh Sarawak (JKMS), Palan Servis Adun enggau Parlimen, NGO enggau orang ngatika diri deka disua ngagai JPBB ungkup atur bekaul enggau bantu nya,” terang iya.

Nya kebuah ku Fatimah, enti sema bisi orang ke patut nerima bantu tu tang laun nerima bantu tu, anang nangi madah ngagai piak JPBB tauka opis Unit Pengintu Pengelantang Sarawak (PKMB) ngambi bejalaika pengawa ke patut.

Nambahka nya, pengawa nganjung bantu pemakai tu dipejalai nengah jalai darat, sungai enggau ngena bilun.

Suara Sarawak