Atur pulai menua diperati baru

KUCHING: Komiti Penyangga Penusah Ngenyit Nengeri (JPBN) deka beratika perambu pulai ke menua ungkup Hari Raya enggau Hari Gawai.

Sapit Kepala Menteri ti mega nyadi Chairman JPBN Datuk Amar Douglas Uggah Embas madahka sida deka beratika perambu bekaul pekara nya berindik ari dua pengerami nya agi lama.

“Naka ke diatu, kami ngelalau mensia mayuh kelebih agi ari menua zon mirah anang guai mulaika diri dulu ngagai menua zon gadung tauka ke rumah panjai.

“Kebuah pia ngambika kitai ulih nagang pengerekai igi penyakit Covid-19 ba menua ke udah likun ari igi penyakit nya sereta dikategorika zon gadung,” ku iya.

Uggah madah munyi nya ba aum pemberita di Wisma Bapa Malaysia ditu, kemari.

Datuk Amar Douglas Uggah Embas

Nangkan nga ku iya, igi penyakit Covid-19 tu ulih ngerekai ngagai endur ke likun enti sema sida ke diau ba menua zon mirah mulaika diri ngagai menua zon gadung.

“Nya kebuah kemari aku mengkang ngelalau sida ke diau ba rumah panjai ngambika enda bejalai ngagai menua zon mirah laban pengerekai igi penyakit tu siti pekara ti enda ulih disadang kitai,” ku iya madah nyemetak.

Ambika chunto ko Uggah, pejalai ari Kuching ke udah dikategori zon mirah ngagai Kapit ti agi dikategori zon gadung ulih ngasuh igi penyakit tu ngerekai ba menua ke dituju nya.

“Tu mih kebuah kami ngelalau sida ke diau ba rumah panjai tauka ba dini-dini alai ngambika diau jenuh aja ba endur sida sereta enda mindah ke bukai kelebih agi menua zon mirah.

“Kelimpah ari nya, tu mega siti ari chara kita nagang pengerekai igi penyakit Covid-19 balat nyadi baka ke digaga Perintah Sarawak nagang temuai ari China tama ngagai nengeri tu keterubah igi penyakit tu balat nyadi suba,” ku iya nerang.

Uggah nandu, pengerami Hari Raya enggau Hari Gawai agi lama deka diintu lalu sida deka beratika pejalai pekara nya ila.

Suara Sarawak