BSN dedat ketegal salah penerang

SIBU: Ujan bangat muakka pagi enda nekul beratus iku nedat Bank Simpanan Nasional (BSN) ba Jalai Kampung Nyabor ditu laban deka ngambi duit BPN pagi tadi.

Chairman Kaunsil Mengeri Sibu (SMC), Clarence Ting Ing Horh, udah madah ngagai piak Polis DiRaja Malaysia (PDRM) Sibu pasal utai ke nyadi.

Ting madahka diri nerima berita pasal utai ke nyadi lebuh bejalaika pengawa nginau nyerumba Atur Tagang Pejalai (PKP).

“Bisi bala kaban SMC meda mensia mayuh berintai ngelui ari 100 meter ba laman bank nya, urung pukul 6 pagi.

“Udah nya aku lalu madah pekara tu ngagai piak polis ngambi matau endur nya,” ku iya.

Iya madah, Ketuai Polis Pelilih Sibu ACP Stanley Jonathan Ringgit bisi nerang mensia mayuh saru penemu pasal penerang ke salah ti dikunsi ba media rama pasal ngambi duit BPN.

Nitihka penerang dibantai ba media rama, duit BPN enda tau enda diambi dalam timpuh dua hari munyi dipadah.

“Nya kebuah, bala penerima ti nadai akaun ba BSN ngelawa bank nya kemari, laban deka ngambi duit sida.

“Ke bendar, duit ari baucher nya tau diambi nyentuk ujung taun tu,” terang iya silik.

Nitihka penerang ari BSN, semua kaunter deka disedia ungkup pengawa nya enggau natak semina 300 iku aja sehari ulih ngambi duit dia.

Kebuah pia laban timpuh baucher agi lama, nyentuk 31 Disember lalu piak BSN deka nentuka semua pengawa lanchar sereta natak tubuh sida ke datai kia nitihka PKP.

Suara Sarawak