Caroline belajar ngaga kain burie ari bakih Facebook

BEPUN ari rindu meda pemanah asil skirt burie bakih nengah Facebook iya, siku pengajar SMK Melugu benama Caroline Jegai nguji enggau orang ngaga kain burie.

Lebuh nadai pengawa ba rumah, bala indu sigi ngepunka pengawa ngasilka bemacham asil keranjai jari kelimpah ari dedunga ba rumah ngambika jam sida enda tebasau pia aja.

Sigi enda nyamai enti nadai pengawa lebuh lepa pengawa. Tambah mega rindu meda bala bakih ba Facebook mantaika asil keranjai jari bebadas ngujungka Caroline bisi ati ngujika empa jari diri empu.

Caroline minta ajar bakih iya bakani chara ngelekat enggau nyait kain burie ba skirt enggau belajar kediri ngujungka iya landik nempa chura kediri ketegal ati rindu.

“Aku terubah bisi runding enggau orang ngaga kain burie tu ari siku bakih ba Facebook iya nya Pengajar Mimie James lalu minta ajar iya bakani deka ngelekatka burie ba kain.

ANGKUN… Caroline entara orang ti landik amat begagaka kain burie.

Ketegal rinduka pengawa tu, aku mutus ati deka nyual kain burie tu laban mayuh peminta kain burie tu ba menua kitai kelebih agi lebuh bisi pengerami enggau hari besai.

Mayuh produk ari kain burie diasilka Caroline baka ngaga skirt, dress, vest lelaki, selampai, necktie enggau sumpin burie.

Sekumbang timpuh Atur Tagang Pejalai (PKP) tu, mayuh awak endur begagaka kain burie tu nitihka udar lalu naka diatu, bisi lebih ari 14 kain burie udah ditembuka aku.

Nyadi siku pengajar, Caroline madah kitai meseti nemu ngatur jam diri baka meri kereja rumah ngagai bala nembiak, ngintu utai ba rumah enggau awak belelak.

“Maya PKP tu, mayuh kain burie udah tembu digaga aku tang aku meseti beratka pelajar bala nembiak udah nya baru berengkah ngaga kain burie tu.

KENANG MANIS… Caroline enggau bala bukai begambar kenang enggau Alfred Jabu Numpang ba sebengkah pengerami di menua tu.

Baka dagang bukai ku Caroline, mayuh pemar ditapi bala pedagang kelebih agi lebuh besemekih enggau bala bukai ke sama bisi dagang sebaka.

“Entara pemar diasaika aku iya nya berundingka chura baru ngambika chura aku nyadi bisi bida enggau nyelai ari orang bukai sereta sida enda leju meda gaya kain burie aku tu.

“Kelimpah deka nangkup peminta bala penguna, aku mega suah ngaga langkar ukir ke baru ngambika sida rindu sereta tekait ati deka meli kain burie nya.

“Taja nadai kala nerima latih, tang aku suah berundingka langkar ukir baru enggau nerima mayuh udar ari bala penguna.

Nangkan nya, indai beranak empat madahka diri kala bedagang lebuh Pengerami Benak 2019 enggau Simposium Ngepan Iban 2019 ba Betong.

PEMILIH… Entara langkar ukir kain burie ditempa jari Caroline.

Terang Caroline, iya berasai gaga amat laban nyentuk diatu, bala penguna ari Miri, Kuching, Sibu, Julau, Kanowit enggau Limbang enda ngetu ngudar kain burie dijual iya lalu penguna ti mayuh ngudar diatu iya nya ari Bintulu.

Ngelansa pasal untung ari dagang kain burie tu, Caroline madah ari dagang kain burie tu untung sebulan manggai RM2,000 enggau lebih nitihka udar bala penguna dalam kandang sebulan.

“Aku berasai gaga amat laban mayuh peminta enggau udar ari bala penguna nandaka sida nyukung dagang aku tu lalu nerima pengalus keranjai jari ba kain burie aku tu.

“Rega skirt nya mega nitihka chura, enti chura tusah digaga, mar rega iya laban chura digaga aku ba skirt nya endang penuh magang.

Mayuh bansa chura diasilka Caroline baka chura burung merak, chura borneo enggau chura ke bukai lalu chura burung merak tu nerima mayuh peminta laban gaya bulu merak tu ke manding dipeda lebuh digaga ba kain burie.

LANDIK… Antin burie tu mega manah amat dikena bala indu ditipak enggau pekayan dilekat burie dikena sida maya bisi pengerami.

Pemanah chura burung merah tu ngasuh dagang Caroline majak laku lalu dikelala mensia mayuh dataika ba menua Limbang.

“Taja pia, bisi ga penguna madahka kain burie aku tu mudah tang enda ngawa asal bisi orang ngudar belama enggau semua orang ulih bekenaka kain burie tu.

“Enti baka nyual mar, nangika kurang udar tang pemadu beguna diatu, semua orang rinduka kain burie digaga aku.

“Kebuah pia, timbal ke manah ari bala penguna meri peransang ngagai aku ngasilka chura bukai enggau nambahka pengalus gaya kain burie nya.

Nambahka nya ku Caroline, mayuh penguna enda nemu milih ni bagi kain burie ke deka dibeli laban aku ngaga mayuh chura lalu aku suah milih ke sida nitihka gaya tubuh enggau skirt nya.

Caroline ngarapka dagang kain burie iya majak diterima enggau ditapatka bala penguna ukai semina ba menua tu tang dataika menua luar.

Taja pia, lebuh jam sekula, Caroline semina nerima 15 udar aja sebulan laban bisi pengawa ba sekula enggau nadai awak mayuh begagaka kain burie tu ke alai tiga iti aja ulih digaga sehari pengudah pulai sekula.

“Aku semina nerima mimit aja udar enggau enti lebih ari nya, aku engkah udar nya ba bulan siti kelimpah lebuh mayuh udar, aku bisi ngupah orang rumah sepiak nulung aku nyait kain tu ngambika pengawa tu jampat tembu enggau datai ba jari bala penguna.

“Udah pulai ngajar, maya malam aku lalu duduk jenuh nyait kain burie tu enda lama sebedau tinduk pengudah bala anak tembu ngaga kereja sekula enggau semua pengawa ba rumah udah terenah magang.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak