Ikan puyu ‘emas’ dikearap mai tuah ngagai Nickell

SARATOK: Ikan puyu ‘emas’ diulih ginti dikearap mai tuah ngagai Nickell Rafell Jali, 20 taun.

Peranak asal Rumah Noel Tengga, Semurin Sebetan madah, ikan puyu emas nya ukai semina ngasuh sida serumah begau, tang nerima timbal ari mensia mayuh lebuh dikunsi ba media rama.

Iya manjung gaga pengudah ginti iya bulih siku ikan puyu chukup nyelai laban ngembuan chura kuning bekilat baka emas lemai kemari.

“Seumur idup aku, tu meh keterubah meda ikan puyu betisik kuning emas baka tu.

“Chukup benasip laban bidik teulihka utai nyelai enggau ngemanah tu,” ku iya gaga ati.

Pemuas ke dedugau nadai pengawa ba rumah ketegal Atur Tagang Pejalai (PKP), Nickell lalu mai adi iya ke benama Marchall Jali,17 taun, nurun nginti.

“Kami duai endang nadai deka mindah jauh, semina nginti ba pendai aja, urung 500 meter penyauh ari rumah panjai.

“Semina rindu bemain ba ai, bulih tauka enda belakang kira. Tang nadai nyangka bulih utai ngemanah tu,” ku Nickell lebuh dirandau Suara Sarawak.

NYELAI… Ikan puyu tisik bechura kuning emas.

Suara Sarawak