Keingat manah pesan niang Temenggung Sumpit

“PEKARA pemadu beguna ba pengidup kitai nadai lebih ari pelajar ngambika bala anak ke diau ba garis entara menua enda tinggal ari orang bukai laban reta enggau pengaya nadai beguna enti kitai nadai pelajar.”

Tu jaku pesan ari siku ketuai raban bansa Dayak Iban chukup pegari nama, Temenggung Martin Sumpit Anak Patih Unggan, ti patut semampai dikeingat anak uchu ichit kitai dataika jemah.

Berita pemidang niang Temenggung Sumpit, 79 taun, balat ngasuh Dayak Iban tegepang ati laban lenyau siku ketuai ti chukup kemerah, siru enggau bagas gawa.

Temenggung raban bansa Dayak Iban Batang Lupar, pelilih menua ba garis entara menua Indonesia – Malaysia, wilayah Kapuas Hulu, Kalimantan Barat.

Niang madamka seput urung pukul 2 lemai (WIB) kena 21 April tu tadi, ngelebu ati mayuh kaban belayan ke diau ba tanah Sarawak laban enda ulih datai meri basa kepenudi ngagai iya berindik atur tagang pejalai ti benung dipejalai perintah jam diatu.

TINGGAL KENANG… Ronn (bediri, kanan) enggau sida sebilik begambar ungkup kenang enggau aki Temenggung Sumpit lebuhka nemuai suba.

Semina berita enggau gambar ti dikunsi bala ari sepiak nyin aja endur bala tiris pantis niang ditu ngemantupka asai ati ti sinu, apin ulih nerima semaya sida deka betemu enggau begawai sama taun tu di Kalimantan Barat udah balang.

Ron Lloyd Albert Jingga, siku ari uchu Temenggung Sumpit madah, sida sebilik kala besemaya deka nemuai ke menua Kalimantan Barat, ngusung kaban belayan din seraya ngintu Gawai Dayak.

“Tusut kami enggau Temenggung Sumpit tu bakatu, indai aku benama Doris Ijah tauka Bidah Anak Dagang, diadaka ini kami ke benama Chandu.

“Nyadi ini Chandu tu menyadi Temenggung Sumpit lalu niang tu pengkuan sida menyadi.

“Kaul kami sebilik tau dikumbai rat laban aya aku ke benama Dr Richard Belanda suah nemuai ke menua Lanjak di Putussibau, ngusung sida niang aki kami tu.

“Aya kami tu diatu ngajar ba sebuah palan pelajar tinggi peribit ba menua tu, ti nyadi siti peransang aki Temenggung Sumpit ngagai bala uchu di menua sepiak nyin,” ku Ron lebuh dirandau Suara Sarawak.

Iya mega madahka diri chukup sinu ngenang diri enda ulih datai enggau nyengai aki sida ba menua sepiak kelimpah berasai asa ingatka semaya enggau niang.

Enda tinggal mega gempung ukai dikuasa perintah (NGO) Dayak selampur menua nyengkaum Dayak Bukit Kelingkang (DBK) bela mantaika penyinu ati enggau sebana sida puang ditinggalka niang pulai ke batang mandai lalu diatu semua nya semina tinggal kenang aja.

Ari jaku kenang sekeda sebelah media rama, niang tu siku ketuai ti rinduka idup ti likun enggau lantang sereta negika pekara pelajar ungkup peranak asal, kelebih agi bansa Dayak Iban.

Temenggung Sumpit mega tebilang nama negi enggau nyaga adat enggau main asal Dayak Iban ti ditampung ari sida ke tuai menya nentika iya enda punas ngapa diseruyut jeman.

Niang mega seruran meransang raban bansa Dayak ngemansangka menua tu ngambi enda tinggal ari arus pemansang, nitihka singkang bansa bukai ke udah dulu maju.

Temenggung Sumpit siku ari ketuai ti bebendar negika pekara pelajar ungkup bala nembiak dia sereta meransang sida angkunka pengawa ngiri penemu.

Niang mega udah mujur ngentak sebuah rumah di Pontianak, endur bala nembiak ari menua nya bemalam lebuh nampung pelajar din, pengawa chukup dipuji.

“Sampi kami, semengat niang diterima Tuhan pemadu bekuasa lalu sida sebilik ti ditinggalka niang deka liat ati napi penguji besai.”

Temenggung bansa Dayak Iban Batang Lupar, Martin Sumpit, iya nya temenggung ketiga lalu mangku penuduk tu kenyau ari taun 2001, sebedau diangkat nyadi Patih Adat.

Suara Sarawak