Kes baru dirampit Covid-19 di Sarawak nurun

KUCHING: Kes positif baru Covid-19 di Sarawak sehari tu nurun ngagai tiga dibanding enggau sebedau tu ngujungka naka tu bisi 488 kes positif ba nengeri tu.

Sapit Kepala Menteri Datuk Amar Douglas Uggah Embas madahka tiga kes nya dirikodka di Kuching, Samarahan enggau Bintulu.

“Ba kes Bintulu, iya ditemu baru pulai ari Samarahan laban nemuai ngagai sida sebilik.

“Pekara tu ditemu pengudah orang ke dilawa iya di Samarahan nya udah ditemu positif Covid-19,” ku iya madah ba aum pemberita di Wisma Bapa Malaysia ditu, tadi.

Ku Uggah ti mega nyadi Chairman Komiti Penyangga Penusah Ngenyit Nengeri (JPBN), nitihka protokol piak Opis Pengerai Nengeri Sarawak (JKNS) deka telefon ngagai semua sida ke bisi kaul semak enggau kes positif tu ngambika ulih diperesa.

“Taja pia, pengudah diperesa, iya endang udah di Bintulu lalu ditemu positif igi penyakit nya.

“Tu entara kebuah Perintah Sarawak enda ngemendarka pejalai mensia mayuh ari siti pelilih menua ngagai pelilih menua ke bukai ngambika nadai penanggul pengerekai igi penyakit nya ba menua bukai,” ku iya.

Nangkan nya ku iya, bisi 19 kes positif udah ditemu gerai sereta dikemendarka pansut ari sepital.

Suara Sarawak