Kes baru positif Covid-19 nurun

KUCHING: Kes baru positif Covid-19 di Sarawak dirikodka nurun ngagai enam kes kemari dibanding sebedau tu ti ngerikodka 10 kes, pia ku Datuk Amar Douglas Uggah Embas.

Sapit Kepala Menteri nya madah, enam kes baru Covid-19 ti nambah kemari ngujungka bisi 403 dirikodka kenyau hari keterubah Covid-19 dirikodka kena 13 March tu tadi.

“Semua enam kes positif nya diubat ba Sepital Besai Sarawak (SGH) enggau bisi 135 kes baru Pesakit Agi Dipatau (PUI) ngujungka bisi 3,319 kes PUI,” ku iya ba aum pemberita pandemik Covid-19 ba Wisma Bapa Malaysia, ditu kemari.

Terang Uggah ti mega Chairman Komiti Penyangga Penusah Ngenyit Nengeri (JPBN), ari penyampau kes PUI nya, 2,824 kes nya negatif seraya 92 kes agi nganti pemutus makmal.

“Pia mega, kitai bisi dua agi kes positif suman iya nya ba Kuching ngujungka 57 kes suman ba menua tu.

“Ari 57 kes nya, 32 kes dirikodka ari SGH, 13 ari Sepital Sibu, semilan ari Sepital Miri enggau tiga ari Sepital Bintulu,” terang iya silik agi.

Ku iya, naka diatu bisi 304 kes positif agi diubat ba SGH enggau mega tiga palan iya nya Kompleks Belia dan Sukan, Anjung Kasih SGH sereta Institusyen Latih KKM di Batu 13 Kuching.

“Kitai mega bisi empat pesakit Covid-19 ti diubat ba SGH agi begunaka bantu ventilator dibanding hari sebedau tu iya nya lima iku.

“Berebak enggau nya, bisi 14 kes pemati udah dirikodka kenyau hari keterubah diripotka kena 17 March tu tadi enggau 12 ari kes pemati nya dirikodka ba SGH enggau dua agi ba Sepital Miri,” tandu iya.

Uggah mega madah, rintai kandang menua ba Zon Mirah nadai nambah di Sarawak naka kemari lebuh mengkang dua endur iya nya ba Kuching enggau Samarahan.

“Nangkan nya, bisi dua pelilih udah berubah ari zon kuning ngagai zon gadung iya nya ba Lawas enggau Matu ngujungka bisi 26 ari 40 pelilih dirintai ba Zo Gadung di menua tu.

“Pelilih Mukah nadai ngerikod kes baru pengelama 33 hari sereta pelilih Sarikei enggau Sri Aman mega nadai kes baru pengelama 22 hari,” terang Uggah silik agi.

Suara Sarawak