Operasyen ngiga lelaki lenyau di Sg Melikat agi puntan

MIRI: Operasi nyidi enggau nyelamat (SAR) siku lelaki lenyau pengudah nurun nginti ba Pangkalan Rembai, Sungai Melikat, Marudi ditu ti masuk hari kedua kemari agi puntan.

Nitih penerang ari Opis Bomba enggau Penyah Penusah (Bomba) Sarawak, pengawa ngiga dikerembai agi nyentuk ngagai 10 kilometer radius ari palan kepenudi endur lelaki nya dipelaba lenyau.

Ku iya, operasyen SAR dipejalai ba sepanjai jalai ke ditengah tudah ke nginti.

“Pengawa ngena chara ‘Follow the Stream’ mega dipejalai ba sepanjai tebing anak sungai endur tudah ke nginti.

“Tang, nyentuk lemai tu tadi (kemari) bedau bisi sebarang kelai,” ku iya nengah sebengkah penerang.

Ku iya, operasyen nya diketu urung pukul 5 lemai laban gaya hari ujan enggau udah petang.

Dulu ari nya, tudah Cassidy Ali, 23, dipelaba lenyau pengudah nurun nginti begulai enggau bala bakih iya ba sungai mit urung 40 minit bedarat ari rumah panjai, kena Hari Lima tu tadi.

Penusah nya baru ditemu pengudah bakih iya pulai ke rumah panjai lalu meda Cassidy lalu bedau pulai ke rumah.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak