Pemanah tikai dianyam Rita semampai laku

LIMBANG: Orang indu endang landik ba semua pengawa jari baka betenun, nusuk manik enggau beranyamka bemacham utai ti diguna kelimpah nyadi pemandang ba bilik penaik diri.

Rita Essau, peranak Rumah Aling, Pulau Brunei ditu madah, tebal agi orang indu ngaga asil pengelandik jari kena ngisi awak pengudah lepa ari pengawa berintuka ruang bilik.

Enti kelia ku iya, sida ke indu megai ngereja pengawa baka nya pengudah tembu mantun seraya nganti padi murai enggau musin ngetau datai.

“Aku diatu semina ngemeranka pengawa beranyamka mayuh macham utai ngambika bisi dipeda bala uchu ichit jemah.

“Tebal agi utai dianyam ari tali kutak laban mar ngiga utai deka dianyam baka bemban, senggang, kerupuk enggau wi,” ku iya.

NEMBUKA UDAR… Rita benung kiruh nganyam tikai ti diudar nengah pelasar dagang online (Facebook).

Nikalka kenang diri, Rita madah iya kala belajar beranyam ari indai iya empu lalu ngena penau enggau penemu diri mujur nempa mayuh macham buah tikai dianyam.

“Ngepunka anyam tikai endang diajar indai aku. Udah nya aku berati enggau ngiga runding nempa buah anyam kediri empu nitihka penau diri.

“Aku mega kala nguji ngaga tikai buluh nyadika lapik mija, dikait ba dinding nyadika pemansang. Chukup rindu meda.

“Tikai ari bemban enggau wi nyau jarang digaga laban nadai endur begigaka utai nya, bisi dijual tang pait diri rega,” terang iya lebuh dirandau Suara Sarawak.

Ku Rita, entara utai suah dianyam baka tikai, bakul enggau kantung sandik ti nerima mayuh peminta pengudah meda asil jari dikunsi bala anak iya sebelah media rama.

PEMANDANG… Sekeda ari asil pengelandik jari Rita kena ngelagu bilik penaik sida sebilik.

“Bisi sekeda dijual, digaga ungkup diri sebilik enggau diberi ngagai bala anak nyadika pengingat sida lebuhka datai nemuai lalu sekeda disimpan aku empu.

“Suah agi diberi aku pia aja ngagai kaban belayan ke datai nemuai ke rumah. Bisi sekeda endang datai nandang laban deka meli tikai tauka utai bukai.

“Tang aku rindu amat meda sida gaga nerima pemeri nyadika pengingat sida nemuai,” ku iya.

Kelimpah ari beranyam, Rita mega rinduka pengawa ngait ubung baka pengawa sida ke indu bukai lebuh maya lepa.

Taja pia ku Rita, iya rindang agi beranyam laban mayuh penemu baru pasal bungai tauka nipakka chura ti manding dipeda deka datai lebuhka beranyam.

CHUKUP LANDIK… Sekeda ari asil pengelandik jari Rita ti nerima mayuh peminta.

“Macham bansa chura tikai kala ditipakka aku. Bisi nya chura mansau enggau burak, kuning enggau chelum lalu kala mega ngujika chura gadung ditipak enggau chelum.

“Belebuh mega sida ke ngudar tikai tauka bakul minta chura enggau bungai anyam nitihka utai dikerindu. Tu mega meri penemu baru ngagai aku,” ku Rita.

Ari beranyam mega ulih nambahka penatai belanja sida sebilik, nyaup bebelika barang dapur kelimpah disimpan ke penabat sebarang penyuntuk jemah, ku iya.

“Anak indu aku ke suah bekunsi asil utai dianyam sebelah media rama baka ba siti page dikumbai Tikai Anyam Bebuah (TAB) ba Facebook.

“Ke bendar, iya tu ke rindu amat meda utai dianyam orang ba page nya lalu bekunsika tikai ke kala dianyam aku.

“Ari nya tadi, bisi sekeda orang minta buah tikai, bisi sekeda lalu ngudar, ngasuh ngaga tikai nunda buah dipeda sida ba page nya.

“Aku nerima udar nitihka pengelantang diri laban pengawa beranyam tu ukai ulih dirumban. Ni meli tali, enti bisi stok tali ba kedai, baik agi. Enti nadai, nya ke nganti lama.

“Rega tikai mega nitihka bungai, chura (berapa iti chura dikedeka) enggau pemesai tikai dipinta sida,” terang Rita.

Nambahka nya ku iya, nyauka semua orang ke beranyam diatu ngena tali kutak laban muntang diulih, bisi dijual sebelah kedai di pasar.

Ku Rita, barang sapa deka ngudar tauka minta dianyamka tikai, kantung sandik enggau bakul sereta utai bukai tau betanya nuju anak iya benama Olivia ba lumur 010-533 7212.

Suara Sarawak