Peranak diau menua baruh dilalau seruran bejimat

SARIKEI: Peranak diau ba kaki bukit enggau tebing sungai ti datai ai bah dilalau seruran bejimat berindik ari gaya hari enda manah kandang beberapa haritu.

Sida mega meseti beratika utai ke nyadi ngelingi lalu anang enda telefon jampat ngagai piak bekaul enti sema bisi penusah nyadi.

Ketuai Balai Bomba enggau Penyah Penusah (BBP) Sarikei, PPgB Mahmudin Narudin madah, ubah gaya hari tau ngasuh penusah besai nuntung.

Nya alai ku iya, peranak patut nyikap diri napi penusah tu nentuka pengelikun reta tengkira enggau nyawa sida.

“Mensia mayuh patut nerima penerang pemadu baru pasal ampuh bah ba endur sida kelimpah semampai nemu sistem ngeluarka gerah ampuh bah ti dibantai nengah media tauka ejensi bekaul.

“Raban kami udah nyikap diri dianjung gawa sebarang maya enggau endur ngambi mantu peranak ti dituntung penusah tu.

“Kami mega benung chakah matau endur ti ditemu ulih kena penusah besai tu,” ku iya nerang, ditu tadi.

Suara Sarawak