PNRB Pakan Julau ngena inisiatif diri mantu orang tusah

JULAU: Pemansang Nembiak Rebak Baru (PNRB) Pakan Julau ngena inisatif diri empu meri mensia mayuh bantu ti ditating penusah ketegal Atur Tagang Pejalai (PKP) dilanjar.

Kelimpah ari gerempung empu, presiden sida, Tedung Chakaw@Jamal Abdullah udah ngena belanja diri nganjung bantu beras ngagai lebih 200 pintu bilik ba pelilih Pakan sebedau tu.

Sapit presiden gerempung, Semana Sawang mega bela gerah jari mansutka belanja dikena meri bantu ngagai 100 pintu bilik ba Dun Meluan.

Maya berandau enggau pengarang berita kemari, Semana madah, diatu gerempung sida benung chakah bepupu mata duit dikena besaup meli barang pemakai ti deka diberi ngagai mensia mayuh.

“Ketegal PKP diatu udah dilanjarkan kami udah ngaga pemutus bepupu nyaup bala mayuh bebelika barang lebih agi sida ke udah putus kereja tauka sida ti begaji hari,” pia ku iya madah.

Ba pekara ke sebaka, gerempung tu udah nyadung bantu ngagai menua bukai baka di Kidurong, Bintulu.

Penerang ke silik bekaul enggau pengawa PNRB Pakan Julau tu tau ditanya ba sekretari sida, Aran Tanggai nengah lumur 019-279 7639.

Suara Sarawak