Semua 82 Dun Sarawak udah nerima bantu – Fatimah

KUCHING: Semua 82 konstitusyen Kunsil Nengeri (Dun) ba selampur Sarawak udah tembu 100 peratus pengawa nganjung bantu pemakai nengah Pakej Bantu Sarawakku Sayang ari Perintah Sarawak.

Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah madah, bantu nya ukai semina ungkup peranak ba mengeri tang nyengkaum bantu ngagai peranak ba menua pesisir.

“Taja napi mayuh pemar lebuh nganjung pemakai tu enda nekul kami nentuka raban diselinting nerima bantu tu.
“Pekara ke patut diatu nentuka utai diguna chukup magang kelebih agi komuniti ti ngasaika penusah jam diatu,” ku iya ngagai Suara Sarawak, ditu ensanus.

Ku Fatimah, pengawa nganjung bantu ngagai peranak ba menua pesisir enggau ba mengeri bisi bida nitihka atur ti udah ditetap.

Kebuh pia laban penusah ditapi peranak ba menua pesisir enggau mengeri tu bisi bida kediri empu.
“Inisiatif kami tu nyelinting rayat ti tusah ngambika sida semampai bisi pemakai sekumbang Atur Tagang Pejalai (PKP) tu.

“Kitai nemu, raban tu mayuh kelebih agi sida ti gawa gaji hari enggau putus pengawa,” ku Fatimah.

Terang iya, pengawa sekeda piak ti madahka bantu nya enda sama tu endang pengawa ke enda patut laban bantu nya diambi ari piak bukai baka gerempung ukai dikuasa perintah (NGO) enggau mega inisiatif ari Adun ba sitak nya empu.

Iya ti kala ngasaika diri ngurung diri ba rumah madahka diri nemu penusah ditapi semua piak diatu kelebih agi sida ke suntuk belanja,” tandu iya.

Ngelansa pasal bantu diberi, iya madahka bantu nya ulih dikena nyentuk ujung taun laban belanja ti diberi nya diunggkupka pengelama enam bulan.

Kelimpah ari nya ku Fatimah, Perintah udah ngasuh piak Opis Menteri Dagang Dalam Menua, Gerempung Kerejasama enggau Pekara Penguna (KPDNKK) semampai matau bekal pemakai ba menua tu ngambi semampai chukup belama.

Suara Sarawak