Siti kes bebadi nyawa, lima kes baru positif di Sarawak

KUCHING: Siti kes bebadi nyawa ketegal Covid-19 nyadi di Sarawak sehari tu lalu ngujungka penyampau kes bebadi nyawa ketegal igi penyakit nya di nengeri tu bisi 17 kes.

Sapit Kepala Menteri ti mega nyadi Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka kes nya nyadi ba siku lelaki beumur 72 taun ari Kampung Tabuan Lot ditu.

“Iya berengkah tabin enggau batuk kenaka 13 April tu tadi lalu kenaka 16 April, iya nganjung diri berubat ngagai Sepital Tungkul Atau Sarawak, Kota Samarahan,” ku iya madah ba aum pemberita di Wisma Bapa Malaysia ditu, tadi.

Nangkan nya ku iya, lebuh ba palan nya, iya ditemu batuk enggau tabin lalu dikategorika Severe Acute Respiratory Infection (SARI).

“Sampel iya diambi kenaka 16 March sereta pemutus ari Real Time RT-PCR 2019 nCoV ari Makmal Sepital Besai Sarawak (SGH) kenaka 18 March madahka iya positif Covid-19.

“Iya bebadi nyawa kena 30 April urung pukul 12.55 tengah hari lalu kes tu nadai sejarah bisi kaul semak enggau kes ke udah positif Covid-19,” ku iya.

Berebak enggau nya, Uggah madahka bisi lima kes positif baru Covid-19 dirikodka ba nengeri tu, kemari.

Ku iya, semua kes nya diripotka di Kuching lalu nadai kes baru diripotka nyadi ba menua bukai.

“Kelimpah ari nya, enam kes udah gerai sereta dikemendarka pansut ari sepital lalu semua kes tu ari SGH.

“Bisi 53 kes Pesakit Agi Dipatau (PUI) sehari tu lalu 40 kes agi nganti pemutus ari makmal,” ku iya nambah.

Ba lansa ke sama, Uggah madahka bisi 97.2 peratus rayat nengeri tu nitihka Atur Tagang Pejalai (PKP), kemari lalu penyampau tu nambah ari selama.

Uggah mega madahka kemari bisi 48 iku orang udah ditan laban ngelaban PKP.

Suara Sarawak