Tietie Ayong rindu bekunsi penemu ngaga kuei

SIMANGGANG: Kitai jarang orang lelaki landik berapi kelebih agi begaga bemacham bansa kuei tang sekumbang PKP, enda ngira indu tauka lelaki sama ngena awak tu mantaika pengelandik diri enggau nguji ngaga bemacham bansa kuei ke muntang digaga.

Nya kebuah, ba media rama baka Facebook, Instagram enggau ke bukai suah amat kitai meda orang bekunsika bansa kuei digaga sida sekumbang timpuh PKP tu laban tepekul ba rumah.

Tietie Ayong, siti nama majak angkat sebelah media rama pengudah dagang kuei laku ba menua tu.

Ku iya, mayuh agi bansa kuei digaga, makin mayuh penemu, pengelandik enggau chara ngaga ditemu kitai.

“Aku deka nampung pengawa nyual kuei tu pengudah abis Atur Tagang Pejalai (PKP) enti agi bisi peminta,” ku Tietie Ayong tauka tampak agi dikangau Apai Kumang lebuh dirandau Suara Sarawak.

NYAMAI… Bak Chang entara kuei nerima mayuh peminta

Dagang iya laku amat ba menua Simanggang laban macham bansa kuei bisi dijual, pemilih ni dikedeka ati.

Kuei digaga mega dipuji belama laban isi kuei nyamai amat kelimpah Tietie nadai minta bayar nganjung kuei nya ngagai rumah sida.

Entara bansa kuei ke bisi dijual Tietie iya nya chakui, bak chang, kuei tekura, apam, pulut puak isi manuk sesar, kuei gelang gula apong, karipap enggau bansa kuei ke bukai nitihka peminta.

Ku iya, entara kuei pemadu laku dijual sekumbang PKP tu baka bak chang, pulut puak manuk, chakui, kuei gelang enggau penganan udah diguring.

Kelimpah ari bejual, Tietie mega enda rangka penemu bekunsika chara begagaka kuei ti suah ditunda bala kaban ba Facebook.

NANGKUP PEMINTA… Peranak Simanggang pemadu mayuh ngudar kuei gelang.

“Aku berasai temegah ati laban orang bukai bisi nunda chara aku begagaka kuei kelimpah nengah Facebook aja endur bekunsika utai tu laban nadai ditulis ba bup,” terang iya.

Sekumbang bejual kuei dalam timpuh tu, Tietie kala bulih untung manggai RM800 seminggu nitihka bansa kuei ti laku.

“Untung bejualka kuei tu bisi amat nambahka belanja kami sebilik kelimpah puku mega pulai ungkup bebelika utai kena ngaga kuei baru.

“Maya PKP tu aja aku nyual kuei ke alai maya bukai endang ngaduka bridal lalu aku bisi tim dikumbai Team Apai Kumang.

“Kami bisi nyendiaka servis ngari orang ti deka melah pinang ngena ngepan asal enggau servis ngambi gambar kawin,” ku iya ngenang pengawa diri.

SETIPAK ENGGAU REGA… Kuei Pulut Isi Manuk tu entara kuei chukup laku dijual Tietie.

Tietie mega madahka diri endang rinduka pengawa ngaga kuei kenyau ari sekula suba, bisi nya belajar ngaga kediri lalu bisi mega nunda chara orang bukai tang diubah iya.

“Pengelandik ngaga kuei tu datai ari aku empu lalu nadai orang ngajar kelimpah suah beratika kuei dijual orang enggau chara ngaga ba bup.

“Aku endang rinduka pengawa tu ari Pom Satu kelia ba taun 1990 lalu berengkah bejual kuei ari taun 2002 nyentuk 2006 ba Batu Lintang, Undop lebuh bini aku gawa ba Klinik Pengerai Batu Lintang dia.

“Tiap pagi aku endang nyual kuei sebelah rumah panjai, ba sekula iya nya DK Batu Lintang, Undop enggau SJKC Batu Lintang.

“Aku semina bejual muakka pagi aja laban bisi kereja tetap ba Opis Rumah Jil Maysia Bagi Menua Sri Aman lalu diatu udah 24 taun gawa dia,” lansa iya.

Mulaika pengingat lama, Tietie madahka iya suah diasuh ngaga kuei lebuh bala pemesai datai ke rumah panjai enggau pengerami bukai baka melah pinang, hari pengada, makai selamat enggau ke bukai.

“Pengawa begagaka kuei tu lama udah ditinggalka aku pengudah bini aku pindah ngagai Poliklinik Sri Aman ba taun 2006 suba.

“Sekumbang nyual kuei tu, aku berasai gaga amat nerima timbal ke manah enggau bala ke meli kuei ba aku madahka sida puas ati enggau pemayuh kuei nya nitihka rega ti patut.

“Ba penemu aku, timbal ari sida ke meli kuei aku lalu madahka kuei nya nyamai enggau setipak enggau rega jauh beguna ari ngira untung ngambika sida enda jera lalu seruran nyukung dagang aku tu,” ku Tietie ngelansa.

Tebal agi, sida ke meli kuei ari Tietie suah madahka bansa kuei dijual iya nyamai enggau mayuh puak setipak enggau rega kelimpah nadai bayar tambah lebuh iya nganjung ngagai rumah sida.

Pengepuh enggau pengelurus ati Tietie lebuh bejual kuei patut amat ditunda bala bukai ke deka ngaul ba pengawa nyual kuei tu ngambika dagang sida laku ssereta nambahka belanja.

“Terima kasih ngagai bala ke udah meli kuei aku lalu ngarapka sida puas ati enggau kuei dijual aku nya sereta timbal sida beguna amat ngambi aku ulih nambah asai ti kurang ba kuei nya.

Nya alai, sida ti diau ba Sri Aman lalu deka meli kuei Tietie tu tau meda nengah Facebook iya tauka udar nengah Whatsapp iya (019-8906265), Tietie Ayong ngambi nemu bansa kuei dijual iya sehari nya enggau rega iya sekali.

Suara Sarawak