Sebana rayat mensia pesisir diperati perintah

KUCHING: Perintah Sarawak ngagihka belanja RM1.6 juta nyadika belanja puku ngagai Bank Simpanan Nasional (BSN) ngambi bejalailka servis bank mindah kin kitu ungkup komuniti ba menua pesisir Sarawak.

Kepala Menteri Datuk Patinggi Abang Johari Tun Openg madah, ungkup ngepunka pengawa tu, kaunter mindah kin kitu BSN deka beoperasyen ba Pakan, Sarikei kena 10 ngagai 11 Meri sebedau kaunter tu dipejalai ngagai sitak bukai ba menua pesisir Sarawak.

“Mayuh bantu diberi Perintah Besai enggau Perintah Sarawak nengah BSN.

“Tang, bisi rayat ba sitak menua pesisir napi penusah ngulihka servis bank laban nadai servis bank ba menua pesisir,” tandu iya.

Abang Johari mansutka jaku nya lebuh mantaika Bantu Khas Sarawakku Sayang (BKSS) 3.0 ke alai Servis Bank Mindah Kin Kitu nya inisiatif ketujuh dalam pakej nya ba Wisma Bapa Malaysia, ditu kemari.

Abang Johari mega ngaga inisiatif nya ngambi bekerejasama enggau Bank Negara Malaysia (BNM), BSN enggau sekeda bank bukai ngambi nyendiaka servis bank ngagai sitak menua pesisir.

“Aku deka madah, servis bank mindah kin kitu ti disikap Mesin ATM MEPS deka beoperasyen ba kandang menua pesisir Sarawak.

“Berebak enggau nya, aku deka nambah geran khas ngagai pedagang mit enggau pedaja ti berejister enggau piak kaunsil kandang menua (PBT) pengelama sebulan agi penyampau RM750,” terang Abang Johari.

Ku iya, kebuah pia laban raban nya ngasaika penusah ketegal pengerekai igi penyakit Covid-19.

“Ba BKSS 2.0, aku udah mantaika Geran Khas RM1,500 ngagai bala pedaja enggau pedagang mit ti berejister enggau PBT ti dibayar dua renggat iya nya RM750 kena bulan Mei enggau RM70 kena bulan Julai tu.

“Ba belanja tambah tu, tiap pedaja enggau pedagang mit deka nerima RM2,250 ungkup semua geran khas nya,” tandu iya.

Kelimpah ari nya, belanja tambah sebulan agi mega deka mantu raban ti napi penusah suntuk belanja maya tu.

Terang Abang Johari, bantu geran khas nya ngena belanja Perintah Sarawak penyampau RM48.75 juta.

Datuk Patinggi Abang Johari Tun Openg

Suara Sarawak