James Jacob Selat, 39 siku agi penanyi Iban ke ngembuan juluk ati jemah deka bisi studio rikoding kediri empu sereta nempa penanyi ke bekualiti ulih pegari ba menua selampur Borneo.

Jacob entara penanyi ti kala tebilang enggau lagu Menantu Kaya Peturun Raja sereta bemacham agi rentak lagu tau negu ati peninga baka rentak joget, balada enggau ke bukai.

Asal ari menua Bintulu sereta anak pengkuan ari tiga diri menyadi tu ngembuan batang pengawa mendam ba sebengkah ejensi perintah ba Bintulu.

Ngelansa pasal batang pengawa bukai ke kala dikereja sebedau nyereta orang nujah dunya pemerindang, Jacob madah diri kala gawa ke tasik nengah sebuah serikat ari Amerika Syarikat (SAMINA Company) nyengkaum serikat ari Brunei. Entara palan endur gawa baka ba Terengganu, Sabah, Labuan enggau Miri.

Mulai ngagai pengawa nyadi pemerindang, Jacob madah keterubah ngerikod album kompulasyen enggau serikat LUH Production di Sibu taun 2002. Udah nya nguji ngaga album kediri keterubah diberi nama Menantu Kaya Peturun Raja dalam taun 2004. Puji Tuhan, album tu nerima timbal ke chukup manah ari bala peminat nyadika peransang aku terus chakah merindang lalu suah dikangau merindang ba mayuh bengkah endur, ku iya.

ALBUM BARU…Album pemadu baru ba baruh perabung GPRS diberi nama Enggai Lenyau Nuan.

ASAM GARAM ARTIS

Maya lepa aku chukup rindu bemain bol,futsal enggau main takraw. Pemar ditapi ba dunya pemerindang, udah asam garam iya aku mega enda ulih lari ari jaku petenah orang sekumbang begelar artis.

“Suah mega ditempa orang cherita ngapa kulu kili ketegal sekeda orang ti enda lantangka pemujur ba pengawa merindang.

“Tang semua nya ditapi aku enggau sabar laban nemu semua nya enda betul sereta enda masuk akal. Aku tetap ngering diri ngena segenteran jaku peransang ke nyebut ‘Alah bisa tegal biasa’ laban ngasai ke diri mayuh peminat,” ku iya seraya ketawa lebuh dirandau pemberita.

Bekunsi pasal peneleba bukai sekumbang nyadi pemerindang iya madah, siti ari pengingat ke enda ulih dibuai iya nya maya menggi gelar sada nyawa pemadu manah (vocal terbaik) ba Pekit Anugerah Lagu Tebilang Iban diatur RTM Miri di Padang Bilun Lama Bintulu taun 2005.

“Maya nya aku sigi enda ngadang diri ngempu gelar nya laban ke besemekih enggau mayuh bala penanyi bukai ke bela enda kurang pemanah sada nyawa.

“Mayuh udah disepi sekumbang nyadi penanyi, bisi orang rindu lalu enda kurang mega ti nguji ngelabuh. Aku dikangau merindang ngena jalai sungai, nengah jalai batang sampai ngelima jam pejalai nuju sesebengkah menua (rumah panjai) tang ketegal pengerindu lalu gagit betemu enggau peminat semua pengelelak nya nadai berasai.

BELA LANDIK BELAGU…Jacob enggau siku agi penanyi tebilang lagu Semampai Ba Ati – Dorsica Robert (kiba).

MESETI NAKAL PEDIS

“Ba penemu aku, ketegal ari nakal pedis enggau sanggup napi pemar baka tu meh aku ulih beretan lalu dikelala peminat nyentuk sehari tu,”ku iya.

Nambah nya ku iya, suah mega nerima kanggau merindang atas panggau lebuh bisi program di Semenanjung lalu sambut ari peminat chukup manah genap kali aku merindang.

“Sambut ari bala peminat din (Semenanjung) chukup manah sereta richah dibanding enggau sambut ngagai penanyi Iban lebuh merindang ba menua diri.

“Tu nyangka sida lelenggau sereta lama udah nganti penanyi enggau beperindang enggau lagu Iban,”ku iya.

Sebedau rikoding enggau Serikat Golden Pearl Recording Studio (GPRS) bepalan di Kuching, Jacob kala ngerikod lagu baruh perabung Serikat Spitfire Recording Company lalu mujur ngeluarka enam iti album baka Menantu Kaya Peturun Raja (2004),Nesal Dudi Nadai Reti (2006),Joget Keling Kenyalang (2007),Vennesa (2009, Joget Dollar Amerika (2010), Joget Sulu Siga (2012) sebedau ngeluarka album Pengujung Pengerindu (2014) enggau ke pemadu baru iya nya Enda Sanggup Lenyau Nuan nengah GPRS.

Ba pengujung randau enggau suara sarawak Jacob sempat ninggal jaku lalau iya lebih agi nuju artis baru anang enda tan ati nujah dunya pemerindang, anang leju belajar utai ke baru.

“Seruran ngembuan ati ti baruh, bebasaka semua kaban artis enda ngira sida nya baru tauka lama seliahka petenah ngagai pangan diri lalu iya ke pemadu beguna anang kelalu lawa.

“Pia mega anang sanggu minta penemu ari penanyi bukai ngicha industri muzik kitai Iban terus mansang ke mua. Aku besampika semua peminat aku gerai belama sereta bela nyaga pengerai diri nyerumba pengerekai igi penyakit Covid-19 tu,”ku iya.

JAMES JACOB SELAT