KUCHING: Komiti Penyangga Penusah Ngenyit Nengeri Sarawak (JPBNS) ngemendarka operasyen bistro ba nengeri tu.

Taja pia, servis pemerindang baka karaoke enggau ‘live band’ enda dikemendar ba bistro.

Sapit Kepala Menteri ti mega nyadi Chairman JPBNS Datuk Amar Douglas Uggah Embas madahka sida ke ditemu nyendiaka servis ti enda dikemendar nya deka dikumbai ngelanggar atur laban sida semina dikemendar nyual pemakai aja.

Berebak enggau nya, Uggah ngelalau mensia mayuh mai pen kediri lebuh bebelika barang ba kedai.

“Kebuah pia laban bisi sekeda palan bebelika barang begunaka mensia mayuh nulis nama enggau penerang diri sebedau tama ngagai kedai sida.

“Pen tu ulih nyadi sebagi ari chara igi penyakit Covid-19 ngerekai ari siku orang ngagai orang bukai ke ngena pen nya,” ku iya.