KUCHING: Lima ari 13 nembiak ba Sekula Henry Gurney, Rumah Jil Puncak Borneo ditu mujur bulih pemutus peresa 5A dalam Sijil Pelajaran Malaysia (SPM) 2019.

Menteri Pengintu Pengelantang Komuniti, Orang Indu enggau Pemansang Anak Mit, Datuk Seri Fatimah Abdullah madahka pemutus nya entara penyulut ke patut dikemegah enti kitai berati ari sukut pengidup bala nembiak nya.

“Aku berasai temegah ati enggau penyulut bala nembiak ba Sekula Henry Gurney di Sarawak laban pemujur tu ulih nyadi peransang ngagai nembiak bukai.

“Pia mega, bisi sekeda sida sebedau tu bisi diasuh nampung pelajar ngagai Politeknik,” ku iya.

Fatimah mansutka jaku nya ngagai pemberita pengudah nerima pejalai nemuai basa ari Sapit Direktor Rumah Jil Sarawak, Fathi Mursidi enggau raban iya di Kuching, ditu kemari.

Ku Fatimah, bala nembiak ba Sekula Henry Gurney ba Puncak Borneo patut diberi peluang kedua mulaika pemanah ulah sida enggau sukung ari bala apai indai sereta komuniti ditu.