KUCHING: Asil subuk pengelama tiga jam ba Jalai Serian-Kuching, Opis Kastam DiRaja Malaysia (JKDM) Sarawak mujur ngemuntanka pengawa mai segerit enggau ai bisa chara belalai ba sitak Perindustrian Demak Laut kena Hari Tiga tu tadi.

Direktor JKDM Sarawak, Datuk Sharifah Halimah Tuanku Taha, asil barang dirampas nya mujur nyelamatka penatai pemisi menua dipelaba RM2.30 juta.

“Bisi 1.77 juta batang segerit enggau 26,308.80 liter ai bisa dirampas dipelaba berega RM1.13 juta seraya duti kastam beungkus RM2.30 juta.

“Berindik ari nya, sebuah entukar bansa Prime Mover enggau sebuah kontena pemesai 40 kaki dipelaba berega RM150,000 dirampas lalu dua iku ditan ungkup mantu mansik kes tu,” ku iya meri penerang.

Terang Halimah, barang tu dibai tama ari luar stesyen Kuching ngena perengka pengangkut darat.

“Pejalai kontena nya dipatau ari luar stesyen enggau mujur diasuh ngetu ba Jalai Serian-Kuching.

“Barang segerit enggau ai bisa nya diangkut ngena serikat perengka pengangkut ti bisi lisin ngambika piak bekuasa enda nemu,” ku iya.