LUNDU: Bisi 100 bungkus pemeri nyerumba Hari Raya Aidilfitri enggau Gawai Dayak udah disadung Skuad Sayang N3 Tanjong Datu ngagai raban gawa ba luan, ditu ensanus.

Skuad Sayang N3 Tanjong Datu ti diuluka Ketuai Indu PBB Tanjong Datu, Fatimah Abdullah udah nyuaka pemeri nya ngarika Kaban Kunsil Nengeri (Adun) Tanjung Datu, Datuk Amar Jamilah Anu.

Pemeri nya dianjung ngagai Indu Opis Polis Pelilih Lundu, raban Imigresyen enggau Kastam ba Kompleks ICQ Biawak enggau Pasukan Gerakan Am (PGA)Telok Melano.

Pemesai Pemerintah Batalion 11 (PGA), Supt. Rosdi Inai ti benung ngabas Pos Telok Melano meri terima kasih ngagai Adun Tanjong Datu laban seruran nyuaka pemeri ngagai staf ti gawa.

“Maya Atur Tagang Pejalai (PKP) tu, kitai duduk aja ba rumah enggau ngerami Hari Raya enggau diri sebilik,” ku Jamilah nengah sebengkah penerang ba laman Facebook iya.

“Polis, soldadu, imigresyen enggau kastam bejaga ba adan menua nentuka kitai likun magang.

“Nya kebuah, aku meri pemeri kuie enggau ai irup kelai terima kasih ngagai sida laban udah nyaga pengelantang enggau pengelikun kitai,” tandu iya.

“Selamat Hari Raya Gawai ngagai semua!,” ku Jamilah.