KUCHING: Sarawak sehari tu ngerikod siti kes baru positif Covid-19 pengudah lapan hari bejurut beresi nadai kes.

Komiti Penyangga Penusah Ngenyit Nengeri (JPBN) ba sebengkah penerang madah, kes pemadu baru nya ari Kuching ngujungka bisi 545 kes naka diatu.

“Kitai mega ngerikod empat kes suman enggau udah pansut ari Sepital Besai Sarawak (SGH).

“Ari kes nya, tiga ari SGH enggau siti kes ari Sepital Bintulu,” ku iya.

Terang JPBN, semua kes positif Covid-19 ti suman enggau pansut ari sepital ngerikod 459 kes tauka 84.22 peratus.

Berebak enggau nya ku iya, bisi 203 kes Pesakit Dipelaba Kena Rampit (PUI) diripotka enggau 208 kes agi nganti pemutus makmal.

Ku JPBN, bisi 5,871 peminta mindah entara pelilih diterima ba 28 buah Indu Opis Pelilih PDRM selampur Sarawak ngujungka naka diatu bisi 55,494 peminta.

“Ari penyampau nya, bisi 51,128 udah dikemendar enggau 4,366 ditulak.

“Raban pematau kemari udah matau 1,931 palan iya nya palan bebelika barang (284), restoran (409), kilang (38), bank( 185), pedaja (25), pasar tani tauka palan mensia mayuh (119), palan besembiang (173), endur belepa (38), taba projek (20) enggau ke bukai (640),” terang iya.

Naka sehari tu, JPBN madahka bisi 30,234 sektor ekonomi madahka diri deka beoperasyen baru udah diterima.

“Ari penyampau nya, 22,134 dipadah nengah online enggau 8,100 nengah email.

“Kami mega udah ngatur pemulai 8,500 iku nembiak ari Semenanjung, Sabah enggau Labuan kemari,” tandu iya.