BINTULU: Enda ibuh ngabang maya Pengerami Gawai Dayak taun tu, ku lalau Menteri Muda ba Opis Kepala Menteri (Undang-Undang enggau Adat Bumiputera), Datuk John Sikie Tayai nangkan komuniti ba sitak Kunsil Nengeri (Dun) Kakus.

Tang ku iya, pengerami (Gawai Dayak) tu tau dirami begulai enggau diri sebilik aja dikena nyeliahka pengerekai igi penyakit Covid-19.

Sikie ti mega Kaban Kunsil Nengeri (Adun) Kakus nangkan peranak ba sitak nya semampai nitihka Standard Atur Pengawa (SOP) ti udah ditetapka sekumbang Atur Tagang Pejalai Besyarat (PKPB) baka nyaga takah semeter, suah agi masu jari ngena hand sanitizer sereta ngena sengkabung mua.

Pia mega, Sikie mesan rayat Dun Kakus ba mengeri sekumbang PKPB tu ngambi diau ba rumah sida aja sereta anang guai pulai ke menua tauka rumah panjai.

“Anang guai pulai ke menua diatu lalu diau jenuh ba rumah sereta anang kelalu suah mindah,” ku iya.

Sikie mansutka jaku nya lebuh nyuaka Projek Mit Pemansang Menua Pesisir (MRP) RM618,755,00 ngagai 45 penerima.

Bala penerima tu nyengkaum gerempung, gerempung ukai dikuasa perintah (NGO) enggau Komiti Pemansang enggau Pengelikun Genturung Pendiau (JKKK) rumah panjai sitak Dun Kakus di Opis Pelilih Tatau, ditu kemari.

Berebak enggau nya, iya meri besai terima kasih ngagai semua staf nyengkaum staf Opis Pelilih Tatau, Selangau enggau Mukah, raban bomba, Kaunsil Pemansang Bintulu (BDA), Opis Pengintu Pengelantang Komuniti (JKM), Palan Servis N60 Kakus, NGO engau Ketuai Komuniti enggau Ketuai Raban Bansa (KMKK) Pelilih Tatau lebuh mantu ngemujurka pengawa nyuaka bantu Sarawakku Sayang Dun Kakus, apin lama ke udah.

John Sikie mega meri besai terima kasih ngagai raban gawa ba luan iya nya piak polis, Raban Soldadu Malaysia (ATM), Rela enggau KMKK ti udah bebendar mantu perintah nagang pandemik Covid-19 tu.

ENDA IBUH NGABANG… Sikie mesan mensia mayuh tau enda ibuh ngabang maya Gawai Dayak tu ila tang kitai semina dikemendar berami enggau diri sebilik aja.