LIMBANG: Sarawak Dayak Iban Association (Sadia) Pampang Limbang nyukung penemu pasal pematut nitihka Standard Atur Pengawa (SOP) nyerumba Atur Tagang Pejalai Besyarat (PKPB) maya ngerami Hari Raya Aidilfitri enggau Gawai Dayak.

Chairman iya, Jerry Seraie Rantai setuju enggau penerang Sapit Kepala Menteri Datuk Amar Douglas Uggah Embas pasal semina dikemendar berami hari keterubah aja enggau ditatak 20 iku aja diri sebilik ulih berami maya pengerami nya.

Ku iya, piak sida mega nambah resolusyen ngerami Gawai nentuka SOP PKPB dititih ngambi nagang pandemik Covid-19.

“Kami mega nambah resolusyen ke manah agi baka ti udah disetuju iya nya orang luar ari pelilih bukai ba Miri enggau Lawas enda dikemendar ngagai Pelilih Limbang.

“Lebuh kami ngerami Gawai bepun lemai tauka malam 31 Mei, kami deka makai serumpu tang enda begempuru ba ruai lalu semina makai enggau diri sebilik ba bilik kami empu,” terang iya.

Jerry mansutka jaku nya ba aum pemberita Sadia Pampang Limbang bekaul nitihka PKPB maya Pengerami Gawai Dayak 2020, ditu kemari.

Jerry madah, maya Gawai tu ila, peranak enda diasuh ngirup tauka ngabang ba ruai rumah panjai ngambi enda betegu enggau pangan diri.

“Maya 1 June tu, kami enda ngasuh orang rumah panjai ngirup tauka ngabang ari ruai ke ruai tang sida semina ngirup ba bilik diri empu aja.

“Kami mega nagang rumah panjai bukai datai ngabang ke rumah panjai bukai,” ku iya nerang.

Terang iya, Chairman Komiti Pemansang enggau Pengelikun Genturung Pendiau (JKKK) tauka Tuai Rumah patut numbuhka siti komiti nentuka atur enggau SOP PKPB dititih ba kandang menua sida.