KUCHING: Sarawak sehari tu ngerikod empat kes baru positif Covid-19.

Sekretariat Komiti Penyangga Penusah Ngenyit Nengeri Sarawak (JPBNS) madahka empat kes nya diripotka ari Kuching, Serian, Bintulu enggau Tanjung Manis.

Tu ngujungka kes positif Covid-19 ba nengeri tu bisi 549 kes kenyau kes keterubah diripotka 13 March tu tadi.

Berindik ari nya mega, tiga pelilih ke udah dikategorika zon gadung nya (Serian, Bintulu enggau Tanjung Manis) betukar ngagai zon kuning lalu 35 pelilih bukai agi ba zon gadung.

Kemari, Serian baru dikategorika zon gadung pengudah 14 hari nadai ngerikodka kes positif baru Covid-19.

Berebak enggau nya, bisi tiga kes udah ditemu suman sereta dikemendar pansut ari sepital seharitu lalu ari penyampau nya, dua kes ari Sepital Besai Sarawak (SGH) lalu siti di Hospital Sibu.

Penyampau nya mega ngujungka kes positif ke udah suma ba nengeri tu bisi 473 kes tauka 86.16 peratus.

Bisi 132 kes Pesakit Agi Dipatau diripotka seharitu lalu 177 kes PUI agi nganti pemutus ari makmal.