BETONG: Peranak rumah panjai kelebih agi ba pelilih Betong dilalau ngambi nitihka Atur Tagang Pejalai Besyarat (PKPB) lebuh ngintu pengerami Gawai Dayak ti deka datai.

Adun Layar Gerald Rentap Jabu ngelalau mensia mayuh ke ngintu gawai ngambika enda begelumu mayuh lu semina ngabang ngagai diri sebilik aja.

“Bala anak, uchu enggau kaban belayan ke diau ba luar rumah panjai tauka pelilih menua bukai tau enda ibuh pulai ke menua.

“Pengawa ngabang mega semina ulih diatur kena 1 June nya aja,” ku iya lebuh dirandau Suara Sarawak.

Kelimpah ari nya, Gerald minta peranak rumah panjai sereta komuniti ba sitak iya ngena pengelebih teknologi digital lebuh meri pesan Gawai Dayak.

“Dalam kandang PKPB tu, chara digital baka ngena kangau video tauka aum video tau dikena meri pesan gawai ngagai bala ke enda ulih sama begawai ba rumah panjai.

“Atur tu digaga perintah ngambika ulih nyaga rayat ari kena rampit igi penyakit Covid-19 ke enda ulih dipeda kitai,” ku iya. Berita penuh dalam Suara Sarawak pagila.