KUCHING: Mensia mayuh ti bisi penerang pasal orang ti begunaka bantu sekumbang Atur Tagang Pejalai Besyarat (PKPB) tu, tau telefon naggai Opis Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit ngambi nerima bantu ke patut.

Menteri Pengintu Pengelantang Komuniti, Orang Indu, Ruang Bilik enggau Pemansang Anak Mit, Datuk Seri Fatimah Abdullah madahka Perintah Sarawak sedar sentang bisi sekeda orang ti laun nerima bantu ari pakej peransang ekonomi bekaul Covid-19 tu.

“Nya kebuah, perintah bisi nyendiaka penerang pasal sida ti begunaka bantu ngambika bantu ke patut ulih diberi ngagai sida ti tusah tu,” ku iya meri penerang, ditu kemari.

Fatimah mansutka jaku nya lebuh meri timbal sentang penerang dibantaika Ketuai Komiti Hak Pendiau Rayat Malaysia (Suhakam) Sarawak Dr Madeline Berma ba sebengkah surat kabar pasal raban peranak asal ke nadai status peranak menua nya raban pemadu tusah enggau begunaka mayuh bantu sekumbang Atur Tagang Pejalai (PKP).

Fatimah madah, Perintah Gempung Parti Sarawak (GPS) mgea sedarka PKP enggau PKPB ti dipejalai ketegal pandemik Covid-19 tu udah meri pangka besai ngagai gaya ekonomi rayat ba Sarawak.

“Ungkup mutarka pangka nya, Kepala Menteri Datuk Patinggi Abang Johari Tun Openg udah mantaika tiga pakej Bantu Khas Sarawakku Sayang,” ku Fatimah.

Terang iya, kena 23 March tu tadi , siti pakej peransang ti ngembuan 16 inisiatif udah dipejalai ngambi ngurangka pangka pandemik nya ba menua tu ti beungkus RM1.15 bilion.

“Nambahka nya, kena 30 March tu tadi, RM16.4 juta belanja tambah mega disedia nengah pengawa nyuaka bantu pemakai ngagai peranak miskin ba kandang menua pesisir enggau mengeri.

“Tu ngujungka bisi 380,887 penerima bantu ari Ketuai Bilik (KIR) ba kandang menua ulu enggau entigis, seranta ba mengeri, nadai endur ngenduh enggau sida ti putus pengawa sereta nadai penatai pemisi ketegal PKP enggau PKPB udah nerima bantu pemakai enda ngira umur, jalai pengarap enggau bansa nyengkaum orang asli ke ukai ukai peranak menua Sarawak,” terang iya.

Nangkan nya ku iya, inisiatif bukai ti udah dipejalai Komiti Penyangga Penusah Ngenyit Bagi Menua enggau Pelilih (DDMC) mantu peranak asal Sarawak nyengkaum peranak ba pelilih menua ulu baka ba Telang Usan, Murum, Mulu, Batang Ai, Meluan, Pakan, Engkilili enggau Balai Ringin.