KUCHING: Kaban Parlimen Santubong, Datuk Seri Wan Junaidi Tuanku Jaafar meri jamin GPS nya parti politik ti bedisiplin enggau pemadu tegap sekumbang dipegai Kepala Menteri Datuk Patinggi Abang Johari Tun Openg.

Ku iya, sekumbang Kepala Menteri megai Sarawak, GPS tetap ngembuan siti pelasar.

“Nya kebuah, aku enda pechayaka bala Kaban Parlimen GPS diatu alah umbuk nyereta parti politik bukai baka ‘nyual kambin enggau manuk’ ba pasar, aku sigi enda pechayaka pekara nya,” ku iya nyemetak madah lebuh dirandau pemberita pengudah ngabas taba projek ba Kampung Selipar Putus, ditu tadi.

Wan Junaidi mansutka jaku nya lebuh ngelansa penerang madahka bisi Kaban Parlimen GPS bisi kaul enggau 129 Kaban Parlimen ti nyukung ngambi numbuhka sebuah Perintah baru di baruh Pakatan Harapan (PH).

Nambahka nya ku iya, nengah Whatsapp ti diterima ari Kaban Parlimen Sarawak kemari mega mantah pasal 129 kaban parlimen ti nyukung nya.

“Pengawa baka tu munyi jaku dibantaika Datuk Sami Vellu sebedau tu, “ini kerja orang gila-gila sahaja,”, nya kebuah jaku tu engkeman enggau utai ke nyadi ke alai 129 sukung kaban parlimen tu engka penyampau lebuh GPS nyukung Tun Dr Mahathir sebedau nyukung Tan Seri Muhyiddin.

“Nya kebuah enda ulih dikena agi lebuh kitai udah nyukung Tan Seri Muhyiddin Yasin lalu kitai nadai berundingka utai bukai laban kitai mengkang enggau iya taja kitai ukai di baruh PN ke alai PN ditambah GPS (PN+GPS), “ ku Wan Junaidi nyemetak madah.

Ku iya ti mega Menteri Pemansang Orang Dagang enggau Gerempung Kerejasama, ari skop politik iya nya kitai agi kediri enggau ari sukut perintah diatu, GPS nyukung penuh Tan Seri Muhyiddin Yassin dalam PN nyadi Menteri Besai ngambi ulih nyamin penegap politik enggau ekonomi menua.

“Enti nadai perintah diatu, engka kitai nadai penanggul nagang pandemik Covid-19.

“Nya alai, kitai patut beterima kasih enggau lantang ati laban bisi Perintah PN+GPS ngujungka menua kitai tegap kelimpah ulih nagang Covid-19 kelimpah kitai entara empat menua pemadu manah nagang pandemik tu ba dunya enggau Asia,” ku iya.