KUCHING: Ketuai Nembiak Parti Sarawak Bersatu (PSB) Dr Johnical Rayong Ngipa ngelaluka penatai dua ex-ketuai PKR, Baru Bian enggau See Chee How masuk parti sida.

Kenu ku Rayong, penatai seduai iya deka ngenegapka agi penyerakup rayat di nengeri tu begempung dalam siti parti baka PSB.

“Iya, aku endang udah lama ngelala Baru kenyau ari PBDS suba, lalu diatu deka begulai baru dalam siti parti ke pemaik rayat lebih agi bansa Dayak ke chukup mayuh di nengeri tu.

“Juluk kitai (PSB) sebaka iya nya deka bebendar ngubah enggau ngangkatka pengidup Dayak ti kelalu lama pedis sekumbang 58 taun ke udah,” ku iya ke mega Mandal Presiden PSB.

Iya madah munyi nya maya dirandau Suara Sarawak bekaul penerang ari Presiden PSB ti madahka dua ketuai nya deka masuk PSB dibantai nengah portal berita di menua tu, tadi.

Dalam portal nya Presiden PSB Datuk Seri Wong Soon Koh madah diri deka mansutka penerang rasmi nengah sebengkaum aum pengarang berita ke deka diatur pagila ba Indu Opis PSB di Pending.

Soon Koh mega madah PSB ngelaluka semua penyukung Baru enggau Chee How di nengeri tu bela masuk PSB.

Beduduk ari penatai dua ketuai nya ngujungka penyampau Adun PSB diatu betambah nyadi enam iya nya ketuai ba sitak Opar iya nya Datuk Ranum Mina, Engkilili (Rayong), Batu Lintang (Chee How), Bawang Assan (Soon Koh), Dudong (Datuk Tiong Tai King) enggau Ba’kelalan (Baru). Udah nya ba renggat Parlimen deka bisi dua (MP) iya nya di sitak Sri Aman (Datuk Masir Kujat) enggau Selangau (Baru).