KUCHING: Parti Rakyat Sarawak (PRS) pechaya sida ulih ngetanka 11 penuduk asal ba pengawa Bepilih Nengeri (PRN) tu deka datai.

Presiden PRS Tan Sri James Jemut Masing madahka iya pechaya ulih ngetanka semua penuduk nya laban semua pengari rayat ari parti nya udah bebendar bejalaika pengawa meri servis ngagai rayat.

“Sekumbang pengerekai Covid-19 enggau Atur Tagang Pejalai (PKP) tu, bala nembiak aku dibaruh PRS udah bebendar nurun mantu rayat.

“Tu kelebih agi ba menua pesisir ke alai mayuh menua pesisir dipegai PRS,” ku iya lebuh dirandau Suara Sarawak di Begunan Masja, ditu pagi tadi.

Nangkan nya lebuh dirandau bekaul enggau PRN ti deka datai, Masing madahka pengawa bepilih disadang deka digaga ba bulan April taun baru.

“Enti nitih enda diatu mih maya ti engkeman dikena ngatur PRN tang berindik ari PKP, semua pekara patut diketuka dulu,” ku iya.

Kelimpah ari nya ku Masing, iya apin ulih nyebut chalun baru ti deka bediri ngarika PRS ba PRN ti deka datai tu.

“Aku nemu sapa bagi sida tu tang semua nya bepanggai ngagai pemutus Kepala Menteri Datuk Patinggi Abang Johari Tun Openg,” ku iya nyaut pandak.