KUCHING: Pengawa beranak puku ke dipejalai Perintah Sarawak nengah teknologi digital tiga taun ke udah enda lebu pengudah nengeri tu ba tikas pemadu atas nyerumba pangka pandemik Covid-19.

Kepala Menteri Datuk Patinggi Abang Johari Tun Openg madah, pemesai guna teknologi digital majak tebantai ketegal Covid-19 ti ngujungka mensia mayuh enda ulih mindah jauh.

“Lebuh igi penyakit Covid-19 ngerekai, kitai nyadi menua keterubah ngemansangka aplikasyen CovidTrace Sarawak ngambi nyamai nyidi mensia mayuh ti pulai ke Sarawak laban irauka gelumbang igi penyakit nya nyadi.

“Nya kebuah, kitai ulih nyidi sida ngena QR Code ti ulih ngempung penerang ngambi nemu sejarah pejalai sida kelimpah mantu mutuska rantai pandemik tu,” terang iya.

Abang Johari mansutka jaku nya lebuh ngelancharka aplikasyen kedua ti dikemansang Perintah Sarawak nengah Sains enggau Kaunsil Multimedia Sarawak (SMA) iya nya Qmunity ba Wisma Bapa Malaysia, ditu tadi. Berita silik dalam Suara Sarawak pagila