Tinggal beberapa hari agi kena 1 June tu, semua kitai ke bansa Dayak deka nyambut pengerami Gawai Dayak 2020.

Taja taun tu, pengerami Gawai deka dirami bebida ari taun ke udah-udah ketegal pangka pengerekai pandemik Covid-19 tang pemesai reti adat Gawai ba bansa Dayak tetap enda kala berubah.

Adat Gawai Dayak tu meseti diintu ba dedini endur kitai diau sekalika ba mengeri tauka rumah panjai dikena ngingat sereta nali adat besai ke udah lama dikemeran aki ini kitai kelia munya.

Beserimbai enggau Pengerami Gawai Dayak tu, penulis rindu mai kitai ngelala sekeda rintai nama Petara nitihka pengarap lama kitai Dayak Iban ngambika sama nemu taja pan diatu tebal agi bansa kitai udah megai pengarap baru (Kristian).

Nitihka cherita pengingat tuai tauka tusun sejarah Perintah Panggau Libau, kebendar nama tujuh bala Petara Iban ti suah dipansa leka timang bala lemambang tu sigi peturun Raja Dayak Iban ari Perintah Panggau Libau (Wijayapura).

Semua sida tu kebendar diri menyadi iya nya anak Raja Patih Libau empu ke endang idup ba dunya nyata sebedau sida beserara enggau kitai mensia sereta diangkat nyadi Petara.

Nya kebuah, maya miring semua nama anak iya meseti disebut magang ditesa sampai tujuh bepun ari ke pemadu tuai iya nya Sengalang Burung, Menjaya, Selempandai (Selempetuh tauka Selempeta), Semerugah tauka Sempulang Gana, Ini Andan, Anda Mara tauka Gangga Ganggong enggau ke pemadu biak dikangau Sibunsu.

Nya kebuah, pengudah sida tu midang semengat sida agi semak kitai mensia lalu dikumbai Iban Petara tauka ‘dewa’ (raban bangsawan ti bekuasa sereta tau ajih) laban ti nadai agi dipeda, tang orang ke bidik lansik ulih ngambi sida tu mimpi sereta amat nulung kitai mensia lebuh iya dikangau ngena sampi adat miring enggau ading.

Raja Patih Sengalang Burung iya nya Petara Perang (God of War) besumbarka Biduk Linggar Natar Di Senggal Gumbang Besabung, Aki Jugau Menaul Tuntung. Iya pemadu dipebasa ba pengarap lama Iban laban iya tau nulung maya pengawa ngayau.

Raja Menjawa tauka Petara Perubat (God of Medicine) besumbarka Manang Langgung Ngembuan Puchung Penyangga Nyawa. Iya diperita mati tuai lalu orang ke dibangun iya deka bepenau nyadi manang sereta ulih ngeraika sebarang orang ti sakit. Ambika chunto dikangau maya pengawa belian.

KAR LAMA….Pengentap pendiau menua Perintah Panggau Libau nitihka pansik karang siku penulis ari menua Indonesia. – Gambar https:elegansipikiran.blogspot.com

Raja Selempandai tauka Petara Penempa (God of Creator) tau begulai enggau tanah perai nyadi kerigai anak mensia, iya mega digelar Raja Selempeta tau ngambuh tubuh mula ada.

Raja Sempulang Gana iya nya Petara Tanah (God of Land) besumbarka Rangka Kirai Raja Sua, Pepat Pudah. Iya tau nulung meri asil ke manah lebuh maya pengawa bumai betaun ambika chunto meruan dikangau maya pengawa Gawai ngemali umai.

Ini Andan iya nya Petara Keadilan (God of Justice). Iya besumbarka Ini Inda Rabung Menua, Ini Inee Rabung Hari, Ini Andan Bepala Bebunga Jirak, Kulit Rapih Betubuh Biak, Baka Dara Biak Ke Disua Digung Bujang.

Anda Mara iya nya Petara Pengaya (God of Wealth) besumbarka Gangga Ganggung Penatai Jalai Raja, Gangga Ganggai Penatai Jalai Kaya suah dikangau maya pengawa Gawai Tuah.

Raja Biku Bunsu Petara (Sibunsu) iya nya Petara Pengeraja (God of Resources) (besumbarka Pantan Inan Raja Jadia, Apai Maga Raja Lama Pun Menua.

Taja pia, nitihka pengarap lama Iban mega ari tujuh iku Petara tu bisi siku Kree Raja Petara ke pemadu besai dulu nyiri sida tujuh ‘dewa dewi’ (Petara Aki Ini) kitai tu bekuasa iya nya dikumbai Raja Entala ti ngaga dunya. Iya meri kuasa ngagai tujuh iku Petara tu tadi ngambika tau nyaup nulung sereta ngesah penusah anak mensia.

Udah tu ila, kami Ruai deka mantaika silik agi sejarah Perintah Panggau Libau ti ditumbuh urung kurun ke-6 Masihi bepalan semak Nanga Sungai Rajang, Sarawak enggau tusun adat Gawai Dayak ngambika terus ditemu, dipansik, diibun sereta dikerembaika kitai nembiak rebak baru.