Apai Sali besilih rumah enggau Apai Seumang Umang 2

Tampung ensera…

NAMA agi deh tak naka iya pengaga tudah Apai Sali nyepi diri ulih ngumbuk Apai Seumang Umang besilih rumah.
Iya lalu beguai guai madah kediri ka pulai mai berita manah ngagai sida menyanak.

Lebuh ka nurun tangga rumah Apai Seumang Umang dia Apai Sali nyau tekait kaki ba pemetung lalu labuh ke tanah. Tang iya nadai berasai pedis laban kelalau gaga bisi rumah baru.

Datai di rumah Apai Sali lalu nusui berita manah nya ngagai Enchelegit, madahka seduai iya Apai Seumang Umang udah besilih rumah lalu mai sida menyanak nya pindah lemai nya.

Nama agi deh lalu bekemas sida Apai Sali sereta lalu pindah lemai nya mega laban rengka ti kena ngidup kediri sigi enda mayuh.

Udah sida menyanak tembu makai lemai nya, dia sida Apai Sali sebilik lalu ka nindukka diri laban ke udah lelak bekau berangkut pindah rumah.

Iya meh baru ka lelap mata sida tindok alai enda mukai mukai hari pan lalu hujan. Ujan labuh naka pemangat.
Nyadi angin ke bepuput pan naka iya pemalat ga laban ti lalu ditangkan ka hari kudi.

Apai Sali nyau bepencha pa pengaga iya ninga lubang tiang rumah iya nya bemunyi.
Nyau naka iya pengingar sereta enda putus putus betimbal timbal enggau pangan diri.

Sali seduai indai iya Enchelegit tak nyau tegenung meda ulah apai iya baka nya, meda iya nadai utai pengaga ngaga.
Makin angin balat bepuput Apai Sali pan lalu enggau panjong panjong ngumbai bunsu ribut ngambi ke udu balat agi bepuput laban rindu ke munyi lubang tiang.

Sekali tak enda mukai mukai sepi sida tiga menyanak tak berenyut asai rumah ke alai sida nya diau.
Apai Sali, Sali enggau Enchelegit pan lalu temati kutu, lama agi balat agi ga rumah sida nya berenyut sereta lalu mupuk chundung.

Nyau kelama ke baka nya tudah Apai Sali pan nyau nadai nemu daya agi laban hari ke petang nadai peda achok mata sereta malam.

Nadai nemu daya minta sah orang bukai sereta nadai nemu chara ngiga kayu kena nyukung rumah iya nya.
Kepuas ke baka nya dia deh rumah Apai Sali pan lalu runtuh, tekebu jamah kabut sereta enggau ujan ujan naban ke sida tiga menyanak ke dalam rumah nya.

Abis meh semua rengka kena sida ngidup kediri nyau abis pecah abis belah.
Sida tiga pan nyau pepusu mega laban basah laban ujan. Nama agi deh nyau gegetar gamal sida tiga belindung beserayungka tusuk atap mulung ke agi bisi tau di ke nyadi kena sida tiga laban ti nganti hari tawas.

“Nadai meh penyadi kitai tiga tu Apai Sali,” pia ku bini iya Enchelegit.

“Rumah kitai ga abis runtuh, reta tengkira kitai ga abis basah, abis pecah. Ba nuan beli laban alah kelakar Apai Seumang Umang.

“Enggi kitai rumah digaga ari kayu teras, ramu manah tang enggi iya tu rumah ke digaga ari ramu ke enda menuku,” ku iya bejaku enggau Apai Sali.

Enchelegit enggau sabak sabak sambil ke merap tudah Sali ke bepaut ba pah laban ti agi getar getar nat ke chelap laban ujan malam nya.

Apai Sali lalu naka iya pengeringat laban baru nemu diri udah dikelakar Apai Seumang Umang.
Tudah Apai Seumang Umang pan nama agi deh tak gali bepanggung patung pa pengelantang malam nya laban diau ba rumah manah ngenang diri diau ba rumah Apai Sali ti naka iya penegap.

Sida Apai Sali menyanak pan lalu beramu baru kena ngaga langkau alai sida iya diau, mantap daun pisang enggau daun pisang lengki ke atap.

Udah nya tembu, sida menyanak lalu bejalai ngagai tuchong bukit ba tinting antara enggau jerami sida Apai Seumang Umang merening rumah sida ti udah disilih Apai Sali enggau Apai Seumang Umang.

“Aih deh deh! Udu meh penyenang sida Apai Seumang Umang sebilik diau din diatu,” pia ku Indai Sali.
Iya lalu rauh rauh nyabak sayau amat meda rumah sida ti diempu Apai Seumang Umang percuma baka nya. Nyadi munyi tu ku leka sabak Enchelegit, indai Sali .

“Sayau meh rumah aku digaga ngena teras bungas diambi ari kampong repa, lalu dilengka ka tudah Apai Sali laki aku tegal ti rindu ninga munyi lubang tiang ba rumah Apai Seumang Umang, iya nya rumah ti enda menuku.

“Nadai penyadi meh kitai tu Apai Sali, tusah agi idup, nyamai agi mati, gamal ga jai, mati ke enggai. Idup merinsa meh aku tu dibai nuan ka beli sereta enda menuku runding sereta pendiau.” pia ku leka sabak Indai Sali.

“Eh, nadai nya ngasoh kitai tussah deh. Diau ba rumah teras pan asai ke diau ba langkau daun lengki meh.

“Seput ke di idup ka kitai, ukai rumah, nama seput kitai idup kitai agi ulih berumah baru ila,” pia ku saut Apai Sali ngering diri ti udah salah penemu.

Nyadi udah nya nyau sepengelama ga sida menyanak ngidup kediri diau ba langkau daun pisang lengki nya, nat ke pemerinsa semina ke enda malai tanah pendiau.

Nyau baka orang ke baru jadi melaki bini meh sida menyanak ngidup kediri udah nya nyau bepungkalka semua reta tengkira kena nupi diri.

Penulis John Adam Gilber

Suara Sarawak