Aram nempa sejarah baru Sarawak

KUCHING : Parti Sarawak Bersatu (PSB) diatu ngelaluka penatai semua ex-kaban Parti Keadilan Rayat ngambika begempung dalam siti parti iya nya PSB dikena nempa sejarah baru di Sarawak.

Presiden iya, Dato Sri Wong Soon Koh madah, pengudah baum enggau dua ex-ketuai PKR (Baru Bian enggau See Chee How) ke baru masuk PSB dia kami setuju bekaul enggau rintai chalun ke patut diangkat ungkup pengawa bepilih besai nengeri (PRN12) ti deka datai.

“Ba pengawa bepilih besai deka datai kami andal ulih menang penuduk enggau majoriti undi dikena numbuhka Perintah Nengeri sereta ngemujurka visyen begulai ungkup rayat Sarawak.

“Tu deka nyadi pemungkal Sarawak ngerintis jalai ke tampak dikena napi pengawa bepilih Parlimen jemah ngambika tau bisi pengari ba perintah besai.

“Taja pia pekara tu ukai muntang laban siti tanggungpengawa ke besai sereta berat disan. Kitai meseti besaup, bebendar gawa awakka tau teulihka pemujur,” ku iya seraya meri Selamat Hari Raya enggau Gawai Dayak.

Soon Koh ke mega Adun Bawang Assan madah munyi nya rambau aum pemberita ngenukuka penatai Adun Ba’Kelalan, Baru Bian enggau Adun Batu Lintang See Chee How masuk PSB ba Indu Opis PSB, di Jalai Pending, pagi tadi. Sama datai Mandal Presiden ke mega Ketuai Nembiak PSB, Dr Johnical Rayong Ngipa, Sekretari Besai PSB George Lo, Adun Opar Datuk Ranum Mina, Kaban Parlimen Sri Aman Datuk Masir Kujat enggau bala bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak